潮文共賞第02話 ︳男人一生 只為尋覓一個肯同自己挨麥記嘅女人 ︳
「潮」是潮流的潮,「文」是網絡文章的文,只要夠爆、夠頂癮、夠貼地、夠好笑,任何文章都可以是潮文。
生活那麼苦,「潮文共賞」由謝遜聲音導航,望為諸位添上一點甜,絕對有益身心健康﹗
第02話﹕男人一生 只為尋覓一個肯同自己挨麥記嘅女人
特別鳴謝﹕張晨("鳥"不起)
⬇️ 原文 ⬇️
是咁的,身邊啲朋友成日問我有咩擇偶條件,巴巴閉閉咁分享佢地嘅心得。
話咩要有劉心悠嘅面孔、法拉嘅笑容、雷凱欣嘅身材、何家淑女嘅後台、Angela Monkey嘅整容醫生。
我多數就一句車埋去:「咁嗰條女會唔會陪你去食麥記先?」
個宅男肥仔拎住個巨無霸,臉容扭曲到好似畢加索啲名畫咁,生命去到一個非常危險嘅階段。聽到依個問題,佢已經從最終幻想中解放出嚟。 他已經死了。
唔想講都要坦白講,一個男人去到廿幾歲,拖住條女,「去邊食飯」依個問題仲難解拆過「南北韓危機」同「阿仙奴N年無冠」。
有時銀包就得嗰幾廿蚊,衰啲講句入星巴克買杯Latte扮吓高尚,已經要行路返屋企。
隔離有個女伴,想食餐經濟啲嘅都要左諗右諗, 「譚仔呀!今日想食米線!」 「吓,好逼喎…」
「沙嗲王呀!都坐得舒服!」 「吓,要等勁耐喎…」
「不如食碗雲吞麵呀!寶貝你想減肥嘛!」 「吓,勁多阿叔阿伯喎…」
「食麥記」?你真係講都唔敢講!就算佢肯,你都唔好意思問。
試過同一位已成歷史塵埃嘅女朋友走入一間茶記。 喂唔差架喎其實! 地板立立令唔在講、餐牌全過膠,令你感受到法國西南部波爾多嘅浪漫迷情、加上圍繞身邊,三部LCD大電視,令你可以喺2013年,觀賞亞視節目:「2010年亞洲小姐決賽」,個種喺過去未來穿梭嘅快感令人縈繞夢域。 一個客飯配咕嚕肉,唔包餐飲都78蚊,絕對唔cheap!
只不過對面個女人就唔係咁諗啦, 聽到入茶記已經成個比達上身咁西口西面, 見到個餐牌直情變埋超級西面人。 大佬,你想做比達都睇吓對面嗰個係唔係莊子啊!
又話唔乾淨、又話個位逼、又話電視機好嘈。
我心諗:「法拉利跑車啲位仲窄,你係咪唔坐先?成日落老蘭啲 clubbing,都唔似好安靜吓話,斷估你都唔會拎本雙城記去老蘭呀,你邊有咁文藝呀?」 ok fine!我諗就凶狠,講就冇份…
最後佢講咗一句:「Honestly,我覺得食餐飯每人三百零蚊好基本囉。」 我心諗:「安甩匙哩,你唔洗強調每人囉,你都冇找過數。係咪?」 我想即刻飛咗佢。 但事實上佢即日已經飛咗我。
悲劇。
我曾經以為女人都是這樣,我曾經想過做「一休和尚」算數。得閒有需要就扑下木魚,以此為樂。
估唔到有生之年仲搵到一個主動同我食麥記嘅女仔。
一個男人要同女朋友食麥記,為咗啲咩? 覺得麥記好好食?覺得麥趣飯好爆趣?覺得陳豪真係會拎住條寬頻線彈出嚟請你飲杯「給不千奴」?
成年人唔好比咁多幻想自己啦,廿幾歲仔要拉個女朋友去食老麥只係因為四個字-「山窮水盡」。
講真,當個女仔提議食麥記嘅時候,我真係懷疑佢係到試探我。只要我話好,就會收取「你是好人」嘅好人卡。
但我見佢咁真心又一試無妨。 一坐低佢就問我食咩,就自己行咗出去買。 我心諗「出事!」
喺麥記兵法之中,只要你戰略得宜,一餐飯嘅價格要超越California Pizza絕對唔係難事。 一個散嗌嘅扭扭粉,掟個靚彎去隔離「麥café」整杯藍梅特飲,加件芝士餅。驀然回首order多客薯條走鹽,雞翼拼盤當做例行,真係我慣了傷心,臨尾飄移外賣一個開心樂園餐,話要換禮物比細佬。成壇嘢已經一百幾廿蚊,仲要未買你個份。
只係說時遲、那時快,女朋友已經買咗返嚟,佢最後要嘅只係廿一蚊嘅麥樂雞餐,無加大、無加三蚊變檸檬茶。 個一嘢已經眼濕濕,我想話俾返錢佢,佢仲借啲意話遲吓食好嘢先比我請返。 我好滾動,我終於流下男兒淚,嗰時仲要搭梗枱。
女朋友問我好地地做咩喊,我唯有話啲洋蔥澀眼,真係「一層一層一層 的剝開我的心」,但係我食梗魚柳包…
嗰一刻,我終於明白,咩叫感動。 踢場足球係運動、 比賽攞獎係激動、 BB出世係作動、上床搞嘢係性衝動、套都唔戴係輕舉妄動、長洲嗰個係張保仔洞,
只有女朋友係你唔太掂嘅情況下,主動拉你去食麥記,仲要顧住你面子,唔令你難堪,掛住個笑樣拖住你隻手仔食薯條,嗰一下先叫感動。
劉心悠始終會老、法拉都有黑面嘅時候、雷凱欣會爆炸、何家淑女你又唔係陳X聰、Angela Monkey都開始同人撞樣啦!
男人一生,尋覓到一個肯同自己挨麥記嘅女人,三個字。
娶得過。
APPLE ● SPOTIFY ● YOUTUBE 等各大平台登場。
----------
【SOCIAL MEDIA。讚好謝遜】
✅ https://linktr.ee/jessontalker