臺灣農諺短劇—「二八亂穿衣」
今仔日咱欲講的俗語是『二八亂穿衣』，聽眾朋友啊，恁有感覺奇怪無？咱臺灣人會講亂穿衫，袂講亂穿衣啊！無毋著，這句俗語是中國北方講華語的地區所流傳出來的。
這句話傳來到台灣，猶原有合咱的節氣，所以才有人提出來用，閣不止仔流行呢。
這句俗語的意思是講咱人二月佮八月，就是寒天拄進入春天，熱天拄進入秋天，這陣的氣候無穩定，有時真寒，有時真熱，所以咱會看著有人穿寒天衫，共時陣嘛有人穿熱天衫，這咱佇公共場所，公車頂懸，捷運頂懸攏看會著的。
另外，咱現代人的經驗，佇這个節氣，氣象報告攏會提醒逐家，日時佮下昏早暗的溫度變化大，愛注意穿衫，毋通去予感著，逐家出門嘛愛加紮一領衫。
啊佇咱老祖先留落來的智慧裡，嘛有一寡佮這句俗語差不多的金言玉語。我這陣就牽山絆林，講出來予逐家來罔聽罔學。
頭一句，『正月寒死龜，二月寒死牛，三月寒死佈田夫』。這是咧講，春天好風光，天氣轉燒烙，毋過嘛有會寒死人的時陣。
第二句，『春寒雨那濺』。就是講春天來到，有寒皙皙，雨來沓滴的時陣，這款的天氣，就是華語所講的『春寒料峭』。
啊春天嘛有熱翕翕的時陣，我一時想無這款的俗語，毋過我有永遠記牢牢的經驗。
這是幾十年前的記持，彼時我蹛桃園，愛去臺南讀冊，每年的寒假過了，就是新學期開學的時陣，彼當陣嘛是正二月的跤兜，北部猶是寒皙皙的天氣，我愛穿長䘼的shirt，閣疊膨紗衫、外套，坐火車落南。
火車一路落南，車頂的溫度就一路升懸，我就共外衫褪掉，溫度閣升懸，外衫就閣褪一領，來到臺南車頭，就賰短䘼的shirt。
行出車頭，我就一手拖行李，另外彼手的手股頭呢，就掛拄才褪落來的彼堆外衫，這款打扮，袂輸是咧走反的難民，真狼狽。
毋過，一人狼狽是狼狽，若是真濟人同齊做伙狼狽，看起來就袂遐狼狽。因為我行出車頭的時，就看著仝款北部落南的同學嘛是仝款懷懷捾捾，仝款是咧走反，心內就會較安慰一點仔。
這个經驗，四年四擺，予我記牢牢，嘛深深了解，氣候毋但四季無仝款，頂港下港嘛是無仝款，佇正二月時陣，頂港人欲落下港，著愛學會曉亂穿衣，對圓棍棍的徛鵝，變身做瘦卑巴的白翎鷥。
黃色標志
zhDecember 07, 2023