Hello VOA - វីអូអេ

អ្នក​ស្រី​ ម៉ម​ ដាត្ថាលីណែត​ ជា​ស្ថាបនិក ​Cam​ Book ​Club​ និង​ជា​អនុ​ប្រធាន​ទទួល​បន្ទុក​កិច្ចការ​ផ្ទៃ​ក្នុង​នៃ​សមាគម​សហគ្រិន​ស្រ្តី​កម្ពុជា ​បាន​ថ្លែង​នៅ​ក្នុង​កម្មវិធី Hello VOA ​ថា ​ការ​គិត​របស់​បុរស​ ខុស​គ្នា​ពី​ការ​គិត​របស់​ស្រ្តី។ ដូច្នេះ​នៅ​គ្រប់​ស្ថាប័ន ការ​ចូលរួម​សហការ​ជា​វិជ្ជមាន​របស់​ស្រ្តី​ជាមួយ​នឹង​បុរស​ មិនថា​លើ​កិច្ចការ​អ្វី​ក៏ដោយ​ ពិតជា​អាចនាំ​នូវ​លទ្ធ​ផល​ការងារ​ដែល​ទទួល​បាន​មាន​តុល្យភាព និង​គុណភាព​ប្រសើរ។ អ្នក​ស្រី​បាន​បន្ថែម​ថា​ ចំណេះដឹង ​បទ​ពិសោធន៍​ ទំនាក់​ទំនង​ ការ​តាំង​ចិត្ត​ខ្ពស់​ កុំ​ខ្លាច​នឿយ​ហ៊ត់ ​មាន​ជំនឿ​ចិត្ត​លើ​ខ្លួន​ឯង​ គឺ​ជា​កត្តា​សំខាន់​ដែល​ស្រ្តី​គួរ​តែ​អភិវឌ្ឍន៍​ខ្លួន​បន្ថែម ដើម្បី​ទទួល​បាន​ការ​ដឹកនាំ​ក្នុង​ស្ថាប័ន​និង​តួនាទី​របស់​ខ្លួន៕ (ធីតា វីន, Hello VOA, ភ្នំពេញ, ៥ មិថុនា ២០២៣)

អង្គការ​សង្គមស៊ីវិល​មួយ​ដែល​តាមដាន​លើ​វិស័យ​គ្រឿង​ស្រវឹង​ក្នុង​ប្រទេស​កម្ពុជា​កំពុង​ប្រមូល​ស្នាម​មេដៃ​របស់​ប្រជាពលរដ្ឋ​នៅ​តាម​បណ្តា​ខេត្ត​មួយចំនួន ក្នុង​គោល​បំណង​ដើម្បី​ស្នើ​ទៅ​រដ្ឋាភិបាល​ដំឡើង​ពន្ធ​ស្រាបៀ និង​គ្រឿង​ស្រវឹង​ផ្សេងៗ ហើយ​ពន្លឿន​ដំណើរការ​អនុម័ត​សេចក្តី​ព្រាងច្បាប់​ស្តី​ពី​គ្រឿ​ងស្រវឹង​សម្រាប់​ប្រទេស​កម្ពុជា ដែល​ត្រូវបាន​ពន្យារ​ពេល​ជា​យូរ​មក​ហើយ។ ការ​ដំឡើងពន្ធ​លើ​ស្រាបៀ និង​គ្រឿង​ស្រវឹង​នេះ ត្រូវបាន​មើល​ឃើញ​ថា នឹង​អាច​កាត់​បន្ថយ​គ្រោះ​ថ្នាក់​ដែល​កើត​ឡើង​ពី​ការ​សេព​គ្រឿ​ង​ស្រវឹង។ លោក យង់ គិមអេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍ​និង​សន្តិភាព ថ្លែង​ថា៖ «ការ​ដំឡើង​ពន្ធ​នេះ វា​ជា​គោល​នយោបាយ​ឈ្នះៗ​ដែរ រដ្ឋ​ក៏​បាន​ចំណូល​ពន្ធ​ច្រើន ហើយ​បញ្ហា​សុខភាព​ក៏​ត្រូវ​បាន​លើក​កម្ពស់ ការ​កាត់​បន្ថយ​គ្រោះ​ថ្នាក់​ផ្សេងៗ​ដោយ​សារ​គ្រឿង​ស្រវឹង​ក៏​ត្រូវ​បាន​កាត់​បន្ថយ»៕ (លោក ស៊ុន ណារិន, Hello VOA, ភ្នំពេញ, ទី២៩ ខែឧសភា ឆ្នាំ២០២៣)

ការ​ធ្វើ​ចំណាក​ស្រុក​ទៅ​រក​ការងារ​ធ្វើ​ទាំង​ក្នុង និង​ក្រៅ​ប្រទេស​ បាន​ក្លាយ​ចលករ​ដ៏សំខាន់សម្រាប់​ការ​អភិវឌ្ឍ​សេដ្ឋកិច្ច និង​កាត់​បន្ថយ​ភាព​ក្រី​ក្រ។ ក៏​ប៉ុន្តែ​អ្នកធ្វើ​ចំណាក​ស្រុក​ជាច្រើននាក់យល់​ដឹង​តិចតួច​នៅ​ឡើយអំពី​ផល​ប៉ះពាល់​ផ្នែក​សុខភាព​ និង​សង្គម​លើ​ពលករ​ចំណាក​ស្រុក និង​ក្រុម​គ្រួសារ​របស់​ពួកគេ ​ជាពិសេស​កូនៗរបស់​ពួកគេ។ នៅ​ក្នុង​កម្មវិធី Hello VOA ស្តី​អំពី​ចំណាកស្រុក អ្នកស្រី ឌុំ ច័ន្ទធីតា មន្ត្រី​កម្មវិធី​ថ្នាក់​ជាតិ​ទទួល​បន្ទុក​សុខភាពនៃអង្គការ​អន្តរជាតិ​ទេសន្តរប្រវេសន៍ ហៅ​កាត់ថា IOM ​ថ្លែង​ថា ការអភិវឌ្ឍ​សង្គម​នឹង​រង​ផល​ប៉ះពាល់ ប្រសិន​បើ​កុមារ​កាន់តែច្រើន​ត្រូវ​រស់នៅ​ឆ្ងាយ​ពី​ឪពុកម្តាយដែល​ធ្វើ​ចំណាកស្រុក៕ (កាន់ វិច្ឆិកា, ភ្នំពេញ, ២៥ ឧសភា ២០២៣)

គណបក្ស​ភ្លើង​ទៀន ដែល​ជា​គណបក្ស​ជំទាស់​ដ៏​ធំ​មួយ បាន​រៀបចំ​បញ្ជី​ឈ្មោះ​បេក្ខជន ដែល​នឹង​ឈរ​ឈ្មោះ​ក្នុង​ការ​បោះ​ឆ្នោត​តំណាង​រាស្រ្ត​នា​ខែ​កក្កដា​ខាង​មុខ​នេះ។ លោក ភូ សុវណ្ណថា ប្រធាន​ប្រតិបត្តិ​ប្រចាំ​ខេត្ត​បាត់ដំបង​របស់​គណបក្ស​ភ្លើង​ទៀន ក៏​បាន​សម្រេច​ឈរ​ឈ្មោះ​សម្រាប់​ការ​បោះ​ឆ្នោត​ខាង​មុខ​នេះ។ នៅ​ក្នុង​កម្មវិធី Hello VOA ស្តី​អំពី​ការ​បោះឆ្នោត លោក​ ភូ សុវណ្ណថា ជំរុញឱ្យ​អាជ្ញាធរ​អនុញ្ញាត​គណបក្ស​ភ្លើង​ទៀនមាន​លទ្ធភាព​គ្រប់គ្រាន់​ក្នុង​ការ​ធ្វើ​យុទ្ធនាការ​រក​សំឡេង​ឆ្នោត ដោយ​ស្មើ​មុខ​ស្មើ​មាត់​ជាមួយ​គណបក្ស​ដទៃ​ទៀត៕ (ស៊ុន ណារិន, Hello VOA, ភ្នំពេញ,១៥ ឧសភា ២០២៣)

កាល​ពី​ខែ​មីនា ឆ្នាំ​២០២៣ លោក​នាយក​រដ្ឋមន្ត្រី ហ៊ុន សែន បាន​ឲ្យ​ដឹង​ថា ​រោងចក្រនៅ​កម្ពុជា​ជាង​ ៧០​ បាន​ព្យួរ​ការងារ​កម្មករ​ជាង​ ៣​ ម៉ឺន​នាក់ ដោយ​លោក​ថា​សភាពការណ៍​សេដ្ឋកិច្ច​ពិភព​លោក​មិន​ល្អ។ នៅ​ក្នុង​កម្មវិធី Hello VOA អ្នកស្រី យ៉ាង សុភ័ណ្ឌ ប្រធាន​សម្ព័ន្ធ​សហជីព​កម្ពុជា បន្ត​ជំរុញ​ឲ្យ​រដ្ឋាភិបាល​ធានា​ការពារ​ផល​ប្រយោជន៍​សម្រាប់​កម្មករ ប្រសិន​បើ​រោង​ចក្រ​បិទ​ទ្វារ ហើយ​កម្មករ​បាត់​បង់​ការងារ៕ (ស៊ុន ណារិន, Hello VOA, ភ្នំពេញ,១៥ ឧសភា ២០២៣)

សេរីភាព​សារព័ត៌មាន​នៅ​កម្ពុជា​ក្នុង​ឆ្នាំ ​២០២៣ ​នេះ ត្រូវ​បាន​អ្នកជំនាញ​ចាត់​ទុក​ថា​មាន​ស្ថានភាពអាក្រក់​ខ្លាំង​ បន្ទាប់​ពី​រដ្ឋាភិបាល​បាន​សម្រេច​បិទវិទ្យុសំឡេង​ប្រជាធិបតេយ្យ​ ដែល​ជា​វិទ្យុ​ឯករាជ្យ​ក្នុង​ស្រុក​ចុងក្រោយ​គេ។ ខណៈ​អ្នកសារព័ត៌មាន​ទូទាំង​ពិភព​លោក​នាំ​គ្នា​ប្រារព្ធ​ទិវា​សេរីភាព​សារព័ត៌មាន​លើកទី​ ៣០ ​នៅ​ខែ​ឧសភា​នេះ នៅ​កម្ពុជា ការ​រឹតត្បិត​លើ​អ្នក​សារព័ត៌មាន​នៅ​តែបន្ត​កើត​មាន។​ កញ្ញា ហ៊ន ថូវ៉ាន អ្នកសារព័ត៌មាន​សេរី​ ​ថ្លែង​ក្នុង​កម្មវិធី Hello VOA សំឡេង​ជំនាន់​ថ្មី​ថា កញ្ញា​ចង់​ឃើញ​ស្ថានភាព​សេរីភាព​សារព័ត៌មាន​នៅ​កម្ពជា​ប្រសើរ​ជាង​ពេល​បច្ចុប្បន្ន៕ (កាន់ វិច្ឆិកា, ភ្នំពេញ, ០៨ ឧសភា ២០២៣)

អ្នកស្រី អ៊ុង ច័ន្ទថុល បាន​ក្លាយជា​នាយិកា​ប្រតិបត្តិ​អង្គការ​មណ្ឌល​ព័ត៌មាន​ស្រ្តី​កម្ពុជា ដែល​ជា​ស្ថាប័ន​សារព័ត៌មាន​ស្ត្រី​តែ​មួយ​គត់​នៅ​ក្នុង​ប្រទេស​កម្ពុជា ដែល​បាន​ធ្វើការ​ផ្សព្វផ្សាយ​អំពី​សិទ្ធិ តួនាទី និង​សារៈសំខាន់​នៃ​ការចូលរួម​របស់​ស្ត្រី​នៅ​ក្នុង​សង្គម​នៃ​ប្រទេស​កម្ពុជា ចាប់តាំងឆ្នាំ ១៩៩៥ មក។ បើទោះបី​ជា​អ្នកស្រី​មិន​មាន​ជំនាញ​ខាង​វិស័យ​សារព័ត៌មាន អ្នកស្រី​បាន​បំពេញ​តួនាទី​ជា​អ្នកដឹកនាំ​ស្ត្រី​មួយ​រូប​ក្នុង​វិស័យ​ដែល​គ្របដណ្តប់​ដោយ​បុរស​នេះ ដោយ​សង្ឃឹម​ថា អ្នក​ស្រី​អាច​ជំរុញ​ឱ្យ​មាន​ការផ្លាស់ប្តូរ​ឥរិយាបថ​សាធារណជន​លើ​តួនាទី​របស់​ស្ត្រី​ក្នុង​សង្គម។ ស្របពេល​ជាមួយ​គ្នា​នោះ អ្នកស្រី​ក៏​បាន​សង្កេត​ឃើញ​ថា សេរីភាព​សារព័ត៌មាន​ក្នុង​ប្រទេស​កម្ពុជា​នៅ​រង​ការរឹត​បន្តឹង ជាពិសេស​ក្នុង​រយៈពេល​ប៉ុន្មាន​ឆ្នាំ​ចុងក្រោយ​នេះ។ ចំណែកឯ​សុវត្ថិភាព​សម្រាប់​អ្នកសារព័ត៌មាន ក៏​មាន​ការប្រឈម​នឹង​ហានិភ័យ ដែល​ជា​ហេតុ​ធ្វើ​ឱ្យ​ស្ត្រី​ក្នុង​វិស័យ​សារព័ត៌មាន​មាន​ចំនួន​តិច ពោល​គឺ​មាន​ចំនួន​ជិត ៥០០ នាក់ ស្មើ​នឹង​ប្រមាណ៩ ភាគរយ​ប៉ុណ្ណោះ​ក្នុង​ចំណោម​អ្នក​សារ​ព័ត៌មាន​សរុប​ប្រមាណ​ជា ៥.០០០ នាក់​នៅ​កម្ពុជា។ អ្នកស្រី អ៊ុង ច័ន្ទថុល បាន​ឱ្យ​ដឹង​ទៀត​ថា ស្ត្រី​ក្នុង​វិស័យ​សារព័ត៌មាន ប្រឈមនឹង​បញ្ហា​ជាច្រើន រួមមាន​ការបៀតបៀន​ផ្លូវភេទ ពាក្យសម្តី​អសុរស និង​អសុវត្ថិភាព៕ (អ្នកស្រី ធីតា វីន, Hello VOA ស្ត្រី​និង​ភាពជា​អ្នកដឹកនាំ, ភ្នំពេញ, ១ ឧសភា ២០២៣)

កម្ពុជា​នឹង​រៀបចំ​ការ​បោះឆ្នោត​ថ្នាក់​ជាតិ​នា​ថ្ងៃទី​ ២៣ ខែកក្កដា ឆ្នាំ​ ២០២៣ ​នេះ ខណៈពលករ​កម្ពុជាយ៉ាង​ហោច​ណាស់​ពីរលាននាក់ បាន​និង​កំពុង​ធ្វើ​ការ​នៅ​ក្រៅ​ប្រទេស។ ពលករ​ចំណាក​ស្រុក​ភាគ​ច្រើន​មិនបាន​ចូលរួម​ការ​បោះឆ្នោត​នោះទេ ដោយ​សារ​តែ​កត្តា​ការងារ ការ​ធ្វើ​ដំណើរ និង​កង្វះ​យន្តការ​គាំទ្រ​ពលករ​ឱ្យ​ចូល​រួមការ​បោះឆ្នោត​ជាដើម។​ លោក ឌី ថេហូយ៉ា ប្រធាន​ផ្នែក​ប្រឆាំងការ​ជួញដូរ​មនុស្ស និង​ទេសន្តរ​ប្រវេសន៍​នៃ​អង្គ​ការ​សង់ត្រាល់ ថ្លែង​ក្នុង​កម្មវិធី Hello VOA ស្តី​ពី​ចំណាក​ស្រុក​ថា នៅ​មុន​ការ​បោះឆ្នោត​ថ្នាក់ជាតិ​នីតិកា​ទី​ ៧ ​ឈាន​មក​ដល់ ពលករ​ចំណាកស្រុករង​សម្ពាធ​នយោបាយ​ ដោយមានការបង្ខំឱ្យ​ចូល​ជាសមាជិក ​និងបម្រើ​កិច្ចការគណបក្ស​នយោបាយ៕ (កាន់ វិច្ឆិកា, ភ្នំពេញ, ២៧ មេសា ២០២៣)

កញ្ញា​ លី ស្រីស្រស់ ប្រធាន​ក្រុម​អ្នក​វិភាគ​វ័យក្មេង​ បាន​លើកឡើង​ថា​ បើ​សិន​ការប្រើប្រាស់វិធានការ​ផ្លូវច្បាប់ ការ​ចាប់​គំរាម​កំហែង​នៅ​បន្ត​កើត​មាន​លើ​អ្នក​នយោបាយក្រុម​ប្រឆាំង ខណៈ​ការ​បង្ក្រាប​លើ​ប្រព័ន្ធ​ផ្សព្វផ្សាយ​ឯករាជ្យ​នៅតែ​មិន​ស្រាកស្រាន្ត​ទេ នោះ​វា​អាច​ធ្វើ​ឱ្យ​ប៉ះពាល់​ដល់​គុណភាព​ការ​បោះឆ្នោត​ ដែល​នឹង​មកដល់​ក្នុង​រយៈពេល​ដ៏​ខ្លី ខាងមុខ។​ កញ្ញា​បាន​បញ្ជាក់​បន្ថែម​ថា ​លំហ​សេរីភាព​របស់​របស់ពលរដ្ឋ​ដែល​ហ៊ានលើក​ឡើង​នូវចំណុច​ខ្វះ​ខាត​ពី​ការ​ដឹកនាំ​របស់​រដ្ឋាភិបាល​ និង​សារព័ត៌មាន​ឯករាជ្យ ដែល​ផ្តល់ព័ត៌មាន​សំខាន់​ដល់ពលរដ្ឋ​ក្នុង​ការ​សម្រេច​ចិត្ត​ថា​ តើ​គាត់​គួរ​បោះឆ្នោត​ឲ្យ​អ្នក​ណា​ កំពុង​ត្រូវ​បាន​បាត់បង់។​ កញ្ញា​អង្កេត​ឃើញ​ថា ពលរដ្ឋ​មានភាព​នឿយ​ណាយ​នៅ​ក្នុង​ការ​បោះឆ្នោត តែ​ទោះ​យ៉ាង​ណា ​ពួកគេនៅ​មាន​សង្ឃឹម​ ប្រសិនមាន​វត្តមាន​គណបក្ស​ប្រឆាំង ពោល​គឺគណបក្ស​ភ្លើងទៀន​ ចូលរួម​ប្រកួត​ប្រជែង​ក្នុង​ការ​បោះឆ្នោត​ខាង​មុខ​នេះ៕ (ខាន់ សុគុំមនោ, Hello VOA, ១៧ មេសា ២០២៣)

កាល​ពី​ពេល​ថ្មីៗ​នេះ ព្រះ​មហាក្សត្រ​បាន​ចេញ​ព្រះ​រាជក្រឹត្យ​ចំនួន​ពីរ ​ដោយ​តែង​តាំង​អតីត​មន្រ្តី​ជាន់​ខ្ពស់​ពីរ​រូប​នៃ​គណបក្ស​ប្រជាធិបតេយ្យ​មូលដ្ឋាន​ (Grassroots Democratic Party) ​ជា​រដ្ឋលេខា​ធិការ ​និង​ជា​អនុ​រដ្ឋ​លេខាធិការ​ក្រសួង​បរិស្ថាន​ ក្រោយ​ពី​ពួកគេ​បាន​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា។ នៅ​ក្នុង​កម្មវិធី​ Hello VOA លោក យ៉េង វីរៈ ប្រធាន​គណបក្ស​ប្រជាធិបតេយ្យ​មូលដ្ឋាន​ បាន​លើក​ឡើង​ថា​ ការ​ចាក​ចេញ​នេះ​មិន​ប៉ះពាល់​ដល់​គណបក្ស​ឡើយ ដោយ​សារគណបក្ស​មាន​គោលការណ៍​បែប​ប្រជាធិបតេយ្យ​ផ្ទៃ​ក្នុង៕ (ស៊ុន ណារិន, Hello VOA, ភ្នំពេញ, ១៣ មេសា ២០២៣)

ក្នុង​រយៈពេល​ប៉ុន្មានឆ្នាំ​ចុងក្រោ​យនេះ នៅកម្ពុជា​គេ​ឃើញ​មាន​ការ​អនុវត្ត​និង​យកចិត្ត​ទុក​ដាក់​ច្រើន​លើ​ការ​រចនា​បែប​ច្នៃប្រតិដ្ឋ​ រួមមាន​ការ​ច្នៃ​ប្រតិដ្ឋ​ដោយ​ប្រើ​កុំព្យូរទ័រ និង​ដោយ​ដៃដើម្បី​បង្កើត​ជាវត្ថុ ឬ​ផលិតផល​នានា​ជាដើម។​ លោក​ នួន សង់ទី ស្ថាបត្យករ និង​ជាអ្នក​រចនា​វ័យ​ក្មេង បាន​ចូលរួម​ក្នុង​គម្រោង​មួយ​ឈ្មោះ​ថា Under the Canopy ឬ​ដែល​ប្រែ​សម្រួល​ជា​ខ្មែរថា «នៅ​ក្រោមម្លប់​ដែល​ផ្តោត​លើ​ភាពច្នៃប្រតិដ្ឋ​ នគរូបនីយកម្ម និង​និរន្តរភាព»។ អ្នក​រចនា​វ័យក្មេង​រូបនេះ​ ​ថ្លែង​ក្នុងកម្មវិធី Hello VOA សំឡេង​ជំនាន់​ថ្មី​ថា ការ​រចនា​បែប​ច្នៃ​ប្រតិដ្ឋជំរុញ​ឱ្យ​សង្គមមាន​ការ​អភិវឌ្ឍ​តាមរយៈ​ការ​បង្កើត​ថ្មី។ (កាន់ វិច្ឆិកា, Hello VOA, ភ្នំពេញ, ១០ មេសា ២០២៣)

អ្នកស្រី​ ម៉ិល ​សុគង្គា ​ជាមេ​ឃុំ​កណ្តែក​ ស្រុក​ប្រាសាទ​បាគង​ ខេត្ត​សៀមរាប​ ប្រាប់​វីអូអេ​ថា​ ពាក្យ​បន្តុះ​បង្អាប់​ និងមាក់​ងាយមក​លើសមត្ថភាពរបស់​ស្រ្តីលែង​ជា​ឧបសគ្គរា​រាំង​ដល់ស្រ្តីក្នុង​ការ​ចូល​រួមអភិវឌ្ឍន៍សង្គម​ តែធ្វើឱ្យ​ស្ត្រីកាន់​តែមាន​កម្លាំងចិត្តចូល​រួមធ្វើ​កា​រ​ជា​មួយបុរសគ្រប់​វិស័យ​។ អ្នក​ស្រីជឿ​ជាក់ថា​ ការចូល​រួម​ដឹក​នាំរបស់ស្រ្តី​គ្រប់លំដាប់ថ្នា​ក់​ តាំង​ពី​ថ្នាក់មូល​ដ្ឋានរហូតទៅដល់ថ្នាក់​ជាតិ ​គឺ​ជា​ការបង្ហាញឱ្យ​ឃើញថាស្រ្តីមិន​មែនទន់​ជ្រាយនោះទេ​ ក៏​ប៉ុន្តែទន់​ភ្លន់ ​ហើយរឹង​មាំ៕​ (​ធីតា ​វីន​, Hello ​VOA, ភ្នំពេញ​, ៣​ ​មេសា ​២០​២៣)

ក្នុង​រយៈពេល​ជាង​ពីរ​ទសវត្សរ៍​ចុងក្រោយ​នេះ ការ​ធ្វើ​ចំណាក​ស្រុក​ទៅ​ធ្វើ​ការ​ក្រៅ​ប្រទេសមាន​ការ​កើនឡើង ស្របពេល​ពលរដ្ឋ​ដែល​ធ្វើ​ចំណាកស្រុក​ទាំង​នោះ​បាន​ចូលរួម​ចំណែក​យ៉ាង​សំខាន់ដល់​សេដ្ឋកិច្ច​កម្ពុជា។ស្ត្រី​ក៏​ជា​អ្នក​រួមចំណែក​ស្ទើរតែ​ស្មើគ្នា​នៃ​អត្ថប្រយោជន៍​ទាំង​នេះ ប៉ុន្តែ​ពួកគេ​ប្រឈម​មុខ​នឹង​បញ្ហា​ក្នុង​ការធ្វើ​ដំណើរ​ចំណាក​ស្រុក​ និង​នៅ​ពេល​ពួកគេ​ត្រឡប់​មក​វិញ។ អ្នកស្រី​ កៅ សុគន្ធ​ផារ៉ាឌី មន្រ្តី​គម្រោង​ថ្នាក់​ជាតិ​នៃអង្គការ​អន្តរជាតិ​ទេសន្តរប្រវេសន៍ ហៅ​កាត់​ថា IOM ថ្លែង​ក្នុង​កម្មវិធី Hello VOA ស្តី​ពី​ពលករ​ចំណាក​ស្រុក​ថា ស្រ្តី​ពលករ​ចំណាក​ស្រុក​ដែល​ត្រឡប់​មក​ស្រុក​កំណើត​វិញ ត្រូវ​ការ​ការ​ជួយ​គាំទ្រ​ផ្នែក​ហិរញ្ញវត្ថុ​ និង​សុខុមាលភាព​សង្គម​ដើម្បី​អាច​ធ្វើ​សមាហរ័ណ​កម្ម​ចូល​ក្នុង​សង្គម​វិញ៕ (អ្នកនាង កាន់ វិច្ឆិកា, ភ្នំពេញ, ២៣ មីនា​ ២០២៣)

លោក​ អ៊ិត សូធឿត នាយក​ផ្នែក​ប្រព័ន្ធ​ផ្សព្វផ្សាយ នៃ​មជ្ឈ​មណ្ឌល​កម្ពុជា​ដើម្បី​ប្រព័ន្ធ​ផ្សព្វ​ផ្សាយឯករាជ្យ ​មើល​ឃើញ​ថា ​កម្តៅ​នយោបាយ​ដែល​កើតមានឡើង​ជា​ហូរហែ​ក្រោយ​ការ​បោះ​ឆ្នោត​ឃុំ​សង្កាត់​ឆ្នាំ​២០១៧មក ដែល​បាន​ធ្វើ​អោយ​ពល​រដ្ឋ និង​ប្រភព​របស់អ្នកសារព័ត៌មាន​ ថមថយ​ការ​បញ្ចេញ​មតិ​ផ្ទាល់​ខ្លួន ​បញ្ចេញ​មតិដោយ​ប្រុង​ប្រយ័ត្ន ឬ​«​រឹតត្បិត​ខ្លួនឯង» ​ក្នុង​ការ​បញ្ចេញ​មតិ​ជា​សាធារណៈ ​ពិសេស​នៅ​ពេល​និយាយ​ទៅ​កាន់ប្រព័ន្ធ​ផ្សព្វ​ផ្សាយ​។ លោកសង្កត់​ធ្ងន់​ថា​ នៅ​ក្នុង​សង្គម​ប្រជាធិបតេយ្យ ដូច​កម្ពុជា ប្រព័ន្ធ​ផ្សព្វ​ផ្សាយ និង​សារ​ព័ត៌មាន​ដែល​ហ៊ាន​រាយការណ៍​អំពី​ហេតុការណ៍​នៅ​ក្នុង​សង្គម​ដោយ​ពុំ​មាន​ការ​ភ័យខ្លាច ពុំ​មាន​ការ​គំរាម​កំហែង និង​ប្រកប​ដោយ​សុវត្ថិភាព គឺ​ជា​តម្រូវការ​ចាំបាច់​របស់​ពលរដ្ឋ។ ​នៅ​ពេល​ខ្វះ​ការ​រាយការណ៍​ព័ត៌មាន​ស៊ីជម្រៅ​អំពី​បញ្ហា​សង្គម​ និង​កិច្ច​ការងារប្រទេស​ជាតិ​ នោះ​នឹង​ពាល់​ដល់​ការ​សម្រេច​ចិត្ត និងសិទ្ធិ​ទទួល​បាន​ព័ត៌មាន​របស់​ពលរដ្ឋម្ចាស់​ឆ្នោត៕ (ខាន់ សុគុំមនោ​, Hello VOA, ភ្នំពេញ​, ទី២០ ខែ​មីនា ឆ្នាំ២០២៣​)

ជារឿយៗ គេតែង​ឃើញ​នៅ​តាម​ភោជនីយដ្ឋាន និង​កន្លែង​លក់​ទំនិញ​មួយ​ចំនួន​តែង​នៅ​សល់​អាហារ​ដែល​លក់​មិនអស់ រីឯ​កន្លែង​ខ្លះទៀត​ឃើញ​មាន​ការលក់​អាហារ​សល់បញ្ចុះ​តម្លៃ ហើយ​អាហារ​ខ្លះ​ត្រូវ​បាន​បោះចោល​ក៏មាន។ ថ្មីៗ​នេះ គេ​ឃើញ​យុវជន​មួយ​ក្រុម​បាន​បង្កើត​គម្រោង​មួយ​ឈ្មោះ​ថា Feel the Deal ដែល​ជា​គម្រោង​ផ្តោត​លើ​ការដោះស្រាយ​បញ្ហា​សំណល់​អាហារ។ កញ្ញា ទឹង ផានាថ សហ​ស្ថាបនិក​គម្រោង Feel the Deal ថ្លែង​ក្នុង​កម្មវិធី Hello VOA សំឡេង​ជំនាន់​ថ្មី​ថា ការយកចិត្ត​ទុកដាក់​ក្នុងការ​គ្រប់គ្រង​អាហារ​សល់ អាច​ជួយ​ទប់ស្កាត់​បញ្ហា​បរិស្ថាន៕ (អ្នកនាង កាន់ វិច្ឆិកា, Hello VOA សំឡេងជំនាន់ថ្មី, ភ្នំពេញ, ១៣ មីនា ២០២៣)

ការ​ពង្រឹង​ក្រម​សីលធម៌​របស់​អ្នក​សារព័ត៌មាន​ត្រូវ​បាន​ភាគី​ពាក់ព័ន្ធ​កំពុង​យក​ចិត្ត​ទុក​ដាក់ ដើម្បី​ធានា​ថា​ ការ​អនុវត្ត​ការងារ​ក្នុង​វិស័យ​សារព័ត៌មាន​ត្រូវ​បាន​ទុក​ចិត្ត​ពី​សាធារណ​ជន។ លោក ណុប វី នាយកប្រតិបត្តិ​សមាគម​សម្ព័ន្ធ​អ្នក​សារព័ត៌មាន​កម្ពុជា ហៅ​កាត់​ថា​ ខេមបូចា បាន​លើក​ឡើង​ថា ​អ្នក​គោរព​ក្រមសីលធម៌​សារព័ត៌មាន​បាន​ដិត​ដល់ នៅ​មាន​ចំនួន​តិច​តួច​នៅ​ឡើយ ដែល​លោក​អាច​ប៉ាន់​ប្រមាណ​ស្ថិត​ក្នុង​រង្វង់​១០% ​នៃ​អ្នក​សារព័ត៌មាន​ទាំង​អស់​ក្នុង​ប្រទេស​កម្ពុជា។នៅ​ក្នុង​បទសម្ភាសន៍​ជាមួយលោក ស៊ុន ណារិន នៃវីអូអេ លោក​ជំរុញ​ឲ្យ​មាន​ការ​បង្កើត​ក្រុម​ប្រឹក្សា​សារព័ត៌មាន​មួយ ដែល​ដើរ​តួនាទី​ឯករាជ្យក្នុង​ការ​ត្រួត​ពិនិត្យ​ការ​អនុវត្ត​ក្រម​សីលធម៌​សារព័ត៌មាន។ (​ស៊ុន ណារិន​, Hello VOA, ភ្នំពេញ​, ​៩ មីនា ២០២៣)

​អ្នកស្រី កែវ ភ័ក្រ្ត​ ​ជាអ្នកដឹកនាំ​ក្រុម​ស្គរនារី​កម្ពុជា​ ដែលមានឈ្មោះ​ថាក្រុម​ «មេធា»​។ អ្នកស្រីបានរៀបរាប់ថា ​ការបង្កើត​ក្រុម​ស្គរនេះ​បាន​ផ្លាស់ប្តូរ​ទស្សនៈ​ដែល​ថា ​ស្ត្រីធ្វើ​អ្វី​មិនបាន​ និង​បញ្ចប់តំណមដែលថា ​ស្ត្រីមិនសមនឹង​លេងស្គរ។​ ជាអ្នកដឹក​នាំ​មួយរូបនៅក្នុងវិស័យ​សិល្បៈ​ទម្រង់សហសម័យ​ អ្នកស្រី កែវ ភ័ក្រ្ត​ មានប្រសាសន៍​ថា ភាព​ជាដឹកនាំ​បាន​បង្រៀន​អ្នកស្រីនូវ​វិធី​សាស្ត្រ​លើកទឹក​ចិត្តសមាជិក​ក្រុម ជាពិសេស​ស្ត្រីៗដែល​ជា​សមាជិក​នៃ​ក្រុម​ស្គរនារី​មេធានេះ ដែលអ្នកស្រី​ថា​ ភាគច្រើន​ជា​ស្ត្រី​មេម៉ាយ​ និងមានគ្រួសារ ​ ​ហើយ​ជួនកាល «បំបៅដោះ​កូនបណ្តើរ​ ផាត់មុខបណ្តើរ» ប៉ុន្តែសម្តែងដោយដាក់ចិត្ត និងបេះដូង៕ (​ខាន់ សុគុំមនោ​, Hello VOA, ភ្នំពេញ​, ​០៦ មីនា ២០២៣)

កម្ពុជា​នឹង​រៀបចំ​ការបោះឆ្នោត​ជ្រើសតាំង​តំណាងរាស្រ្ត ឬ​ហៅ​ថា​ការបោះឆ្នោត​ថ្នាក់​ជាតិ នៅ​ថ្ងៃ​ទី២៣ ខែកក្កដា ឆ្នាំ ២០២៣ ខាងមុខ។ ពលករ​ខ្មែរ​ជាង​១​លាន​នាក់​កំពុង​ធ្វើការ​ស្របច្បាប់​នៅ​ក្រៅ​ប្រទេស​ដោយ​ពិបាក​ក្នុង​ការធ្វើ​ដំណើរ​មក​ចូលរួម​ការបោះឆ្នោត ស្របពេល​ដែល​មិនមាន​យន្តការ​ណាមួយ​ដែល​អាច​ឱ្យ​ពួកគេ​បោះឆ្នោត​ពី​ប្រទេស​ដែល​ពួកគេ​កំពុង​រស់នៅ និង​ធ្វើការ​នៅឡើយ។ លោក ឃុន ថារ៉ូ ប្រធាន​កម្មវិធី​ការងារ​នៃ​មជ្ឈមណ្ឌល​សម្ព័ន្ធភាព​ការងារ និង​សិទ្ធិ​មនុស្ស ហៅ​កាត់​ថា​ សង់​ត្រាល់ ថ្លែង​ក្នុង​កម្មវិធី Hello VOA ស្តីពី​ពលករ​ចំណាក​ស្រុក​ថា ពលករ​ចំណាក​ស្រុក​នៅតែ​មាន​ឧសគ្គ​ក្នុង​ការចូលរួម​បោះឆ្នោត៕ (អ្នកនាង កាន់ វិច្ឆិកា, ភ្នំពេញ, ២៣ កុម្ភៈ​ ២០២៣)

​ប្រធាន​គណៈកម្មាធិការ​ប្រតិបត្តិ​គណបក្ស​ភ្លើងទៀន​ ខេត្ត​កំពង់ធំ​ លោក ស៊ុន ចន្ធី ​លើក​ឡើងថា​ នៅ​តាម​មូលដ្ឋាន​ ការ​យារយី ការទិញ​ទឹកចិត្តសកម្មជន​ ជាពិសេស​ការ​បង្ខំ​សកម្មជន​នៅ​មូលដ្ឋាន​ឱ្យ​ចាកចេញ​ពី​គណបក្ស​ខ្លួន និង​ការ​ដាក់​សម្ពាធ​ឱ្យ​សកម្មជន​ធ្វើ​សកម្មភាព​ផ្សេងៗ ដូចជា​ទម្លាក់​ស្លាក​គណបក្ស​ជាដើម​ នៅតែ​កើត​មាន​ឡើង​ដដែល​និង​ជា​បន្តបន្ទាប់​ មុន​ថ្ងៃ​បោះ​ឆ្នោត​ថ្នាក់​ជាតិ​ឆ្នាំ ២០២៣ ឈាន​មក​ដល់។ លោក​ថ្លែង​បន្ត​ថា សមត្ថកិច្ច​នគរបាល​មូលដ្ឋាន តែង​មាន​វត្តមាន​ ថតរូប​ និង​បង្ក​ការ​រំខាន​នៅ​ទីតាំង​សកម្មភាព​ជួបប្រជុំ​របស់​គណបក្ស​ភ្លើងទៀន​ បើ​ទោះ​បី​ជា​គណបក្ស​នេះ​ បាន​ជូន​ដំណឹង​មុន​ហើយ​ក៏​ដោយ។ លោក ស៊ុន ចន្ធី បាន​សង្កត់​ធ្ងន់​ថា បរិយាកាស​បែបនេះនឹង​មិន​អាច​ឱ្យ​គណបក្ស​តូចៗ​ដូច​ជា​គណបក្ស​ភ្លើងទៀន ​ទទួល​បាន​ភាព​ស្មើភាព​គ្នា​នៅ​ក្នុង​ការ​ប្រកួត​ប្រជែង​បាន​ទេ៕ (អ្នកនាង ខាន់ សុគុំមនោ, Hello VOA, ភ្នំពេញ, ទី២០ ខែ​កុម្ភៈ​ ឆ្នាំ២០២៣)

សរសេរ​កូដ​ គឺ​ជា​ផ្នែក​មួយ​នៃ​កម្មវិធីសិក្សា STEM ដែល​សំដៅ​លើ​មុខជំនាញ​ផ្នែក ​វិទ្យាសាស្ត្រ បច្ចេកវិទ្យា វិស្វកម្ម និង​គណិតវិទ្យា។ ការ​សរសេរ​កូដកុំព្យូទ័រ​នេះ​ គឺជាមេរៀន​ថ្មី​នៅ​កម្ពុជា ជាពិសេស​សម្រាប់​ក្មេងស្រី។ បច្ចុប្បន្ន​នៅ​កម្ពុជា គេ​ឃើញមាន​យុវជន​មួយ​ក្រុម​បាន​រួមគ្នា​បង្កើត​ក្លឹប​សរសេរ​កូដ​មួយឈ្មោះថា Code for Girls ដើម្បី​បង្រៀន​ដល់​យុវតី​ឱ្យ​ចេះ​សរសេរ​កូដ ​និង​បង្កើត​កម្មវិធី​នានាក្នុងវិស័យ​ព័ត៌មានវិទ្យា​ដោយ​ឥតគិតថ្លៃ។ កញ្ញា រិទ្ធិ សុវណ្ណដាលីន ស្ថាបនិក​គម្រោង Code For Girls ​ថ្លែង​នៅ​ក្នុងកម្មវិធី Hello VOA សំឡេង​ជំនាន់​ថ្មី​ថា គម្រោង Code For Girls ជំរុញ​ឱ្យ​សិស្ស​ស្រី​ចូលរួម​ក្នុង​ការ​សរសេរ​កូដ​កុំព្យូទ័រកាន់​តែច្រើន៕ (អ្នកនាង កាន់ វិច្ឆិកា, Hello VOA សំឡេងជំនាន់ថ្មី, ភ្នំពេញ, ១៣ កុម្ភៈ ២០២៣)