Hello VOA - វីអូអេ

កាលពី​ខែវិច្ឆិកា ឆ្នាំ​២០២២ អង្គការ​ឃ្លាំមើល​សិទ្ធិ​មនុស្ស Human Rights Watch ដែល​មាន​ទីស្នាក់​កណ្តាល​នៅ​សហរដ្ឋ​អាមេរិក បាន​ចោទ​ប្រកាន់​រដ្ឋាភិបាល​កម្ពុជា​ថា​បាន​ប្រើប្រាស់​ការឆ្លង​រាតត្បាត​នៃ​ជំងឺ​កូវីដ​១៩ ដើម្បី​ឃុំខ្លួន​សកម្មជន​សហជីព រឹតត្បិត​ការចុះ​បញ្ជី​សហជីព និង​បិទ​សិទ្ធិ​ធ្វើ​កូដកម្ម​នៅ​ក្នុង​ឧស្សាហកម្ម​កាត់ដេរ និង​ទេសចរណ៍។ អ្នកស្រី អ៊ូ ទេពផល្លីន ប្រធាន​សហព័ន្ធ​សហជីព​កម្មករ ចំណី​អាហារ និង​សេវាកម្ម បាន​ថ្លែង​ថា នៅ​ពេល​ដែល​ច្បាប់​ការពារ​ប្រយោជន៍​របស់​វិស័យ​ឯកជន នោះ​កម្មករ​និយោជិត​នឹង​ក្លាយជា​ទាសករ​សម័យ​ទំនើប៕ (លោក ស៊ុន ណារិន, Hello VOA, ភ្នំពេញ, ៩ កុម្ភៈ ២០២៣)

បណ្ឌិត អ៊ឹម​ សុខសម្ផស្ស​ ជា​អ្នក​សិក្សា​ស្រាវជ្រាវ​ថ្នាក់​ក្រោយ​បណ្ឌិត​លើ​គោល​នយោបាយសាធារណៈ។​ អ្នកស្រី​មានប្រសាសន៍​ថា ដោយសារ​តែ​អ្នកស្រី​តែងតែ​ងឿង​ឆ្ងល់​ច្រើនកាលពី​នៅ​វ័យ​ក្មេង ទើប​ធ្វើ​ឱ្យ​អ្នកស្រី​ចាប់​អារម្មណ៍​ខ្លាំង​លើ​ការងារ​ជា​អ្នកស្រាវ​ជ្រាវ រហូតបានបញ្ចប់ការសិក្សា​អប់រំ​កម្រិត​ខ្ពស់។ អ្នកស្រីបាន​បញ្ចប់​ការសិក្សា​ថ្នាក់បណ្ឌិត​ផ្នែក​នយោបាយ នៅ​សាកលវិទ្យាល័យ​ហាវ៉ៃ នៃ​សហរដ្ឋ​អាមេរិក។ អ្នកស្រី​បាន​ថ្លែង​ថា ​ការ​តាំងចិត្ត​ដោយ​ខ្លួនឯង​ ការ​មាន​មហិច្ឆតា បូករួម​នឹងការ​ជំរុញ​លើកទឹក​ចិត្ត​ពី​គ្រួសារ បាន​ធ្វើ​ឱ្យ​អ្នកស្រី​ជម្នះ​ឧបសគ្គ​ រហូត​បានសម្រេច​ក្តី​ស្រមៃ។ សូម​អស់​លោក​អ្នកនាងស្តាប់​បទសម្ភាសន៍​នេះ​ទាំងស្រុង​ដូចតទៅ៕

ទោះជា​ប្រទេស​ចិន​បាន​ជាប់គាំង​សេដ្ឋកិច្ច​៣ឆ្នាំ​ជាមួយ​នឹង​វិធានការ ​«សូន្យកូវីដ»​ តែ​ទំនាក់​ទំនង​រវាង​អាស៊ាន​និង​ចិន ​កាន់តែ​មាន​ភាព​រឹងមាំ ដែល​តម្រូវ​ឲ្យ​សហរដ្ឋ​អាមេរិក​ជា​មហាអំណាច​បន្ត​ប្រឹងប្រែង​រិត​ចំណង​ទាក់ទង​ថែម​ទៀត​ជាមួយ​តំបន់​អាស៊ាន​ ជាពិសេស​ពេល​ចិន​បើក​ប្រទេស​ឡើងវិញ​នេះ។ អ្នកជំនាញ​កិច្ចការ​តំបន់ លោក​បណ្ឌិត​ ឈាង វណ្ណារិទ្ធ ​ប្រធាន​វិទ្យាស្ថាន​ចក្ខុ​វិស័យ​អាស៊ី ​បាន​ថ្លែង​ថា ​ដោយឈរ​លើ​ផលប្រយោជន៍​សេដ្ឋកិច្ច នយោបាយ​ ក្នុង​តំបន់​ដែលមាន​សក្តានុពល​នេះ ​ប្រទេស​ក្នុង​តំបន់​អាស៊ាន​នៅ​បន្ត​ពង្រឹង​ អព្យាក្រឹតភាព ​មជ្ឈភាព និង​ សាមគ្តីភាព ​តំបន់ ទោះជា​មាន​ការ​ប្រែប្រួល​នយោបាយ​ខ្លះ​ក្នុង​ប្រទេស​មួយ​ចំនួន​នៃ​តំបន់​អាស៊ី​អាគ្នេយ៍​ឬ​អាស៊ាន​ក៏​ពិត​មែន។ នៅ​ក្នុង​កម្មវិធី ​ហេឡូវីអូអេ ​ប្រចាំខែ​កុម្ភ:​ ឆ្នាំ​២០២៣ ​ស្តីពី​អាស៊ាន ​ លោក​ សុខ ខេមរា ​នៃ វីអូអេ ​បាន​អញ្ជើញ​លោក​ ឈាង វណ្ណារិទ្ធ​ដើម្បី​ពន្យល់​អំពី​កិច្ចការ​តំបន់​មួយ​ចំនួន​ ទាក់ទង​ទៅនឹង​ «ទំនាក់​ទំនង អាស៊ាន-ចិន​និង​ការ​ប្រែប្រួល​ភូមិសាស្ត្រ​នយោបាយ​តំបន់​ក្រោយ​ជំងឺកូវីដ»៕

ចាប់ពី​ពេល​ដែល​កម្ពុជា​រង​ការ​រាតត្បាត​នៃ​ជំងឺកូវីដ​១៩ តាំងពី​ដើម​ឆ្នាំ​ ២០២០ ​មក គេ​ឃើញ​ថា កម្មករ​និង​ពលករ​កម្ពុជាក៏​រង​ផល​ប៉ះពាល់​យ៉ាង​ខ្លាំង​ផងដែរ។ ពួកគេ​មួយ​ចំនួន​បាន​បាត់បង់​ការងារ ខ្លះ​ត្រូវបាន​កាត់​បន្ថយ​ប្រាក់​ចំណូល។ រីឯ ពលករ​ចំណាក​ស្រុក​នៅ​ក្រៅប្រទេស​ជា​ច្រើន ក៏​ត្រូវ​ធ្វើ​ដំណើរ​វិល​ត្រឡប់មក​ស្រុក​កំណើត​នៅ​កម្ពុជា​វិញ​ផងដែរ បន្ទាប់​ពី​បាត់បង់​ការងារ។​ កញ្ញា ទ្រី សុភា មន្ត្រី​ផ្នែក​ទេសន្ត​ប្រវេសន៍​នៃ​មជ្ឈមណ្ឌលសម្ព័ន្ធភាព​ការងារ និងសិទ្ធិមនុស្ស ហៅ​កាត់​ថា​ សង់​ត្រាល់​ ថ្លែង​ក្នុង​កម្មវិធី Hello VOA ស្តី​ពី​ពលករ​ចំណាក​ស្រុក​ថា គម្រោង​បង្កើន​ការងារ​ជនបទ​ដើម្បីស្តារ​សេដ្ឋកិច្ច​ដែល​រង​ផល​ប៉ះពាល់​ដោយសារ​ជំងឺ​កូវីដ​១៩ ជំរុញ​ឱ្យ​ពលករ​ធ្វើ​ចំណាក​ស្រុក​ដោយ​សុវត្ថិភាព និង​មាន​ជម្រើស។ (អ្នកនាង កាន់ វិច្ឆិកា, Hello VOA, ភ្នំពេញ, ២៦ មករា ២០២៣)

កម្ពុជា​នឹង​រៀបចំការ​បោះឆ្នោតថ្នាក់ជាតិ នា​ថ្ងៃ​ទី ២៣ ខែកក្កដា ឆ្នាំ ២០២៣ ខាងមុខ។ លោក ស៊ឹង សែន​ករុណា អនុ​ប្រធាន​ផ្នែក​ឃ្លាំមើល​សិទ្ធិ​មនុស្ស​នៃ​សមាគម​អាដហុក បាន​ថ្លែង​ថា​ លោក​មិន​ចង់​ឃើញ​ស្ថានភាព​នយោបាយ​ធ្លាក់​ធ្ងន់​ធ្ងរ វិល​ត្រឡប់​ជាន់​ដាន​ដដែល។ លោក​ក៏​អំពាវនាវ​កុំ​ឲ្យ​អ្នក​នយោបាយប្រើ​ប្រាស់​ «មធ្យោបាយ​ទុច្ចរិត» ដើម្បី​យក​ឈ្នះ​ចាញ់​គ្នា៕ (ស៊ុន ណារិន, Hello VOA, ភ្នំពេញ ១៦ មករា ២០២៣)

កម្ពុជា​រៀបចំ​ការ​បោះ​ឆ្នោត​ជ្រើស​តាំង​តំណាងរាស្ត្រ នៅ​ថ្ងៃអាទិត្យ ទី​ ២៣ ខែ​កក្កដា ប្រមាណ​កន្លះឆ្នាំ​ខាង​មុខ​នេះ។ នៅ​ខែមករា​នេះ​ លោក កន សាវាង្ស​ ជា​អ្នក​សម្រប​សម្រួល​ផ្នែក​កម្មវិធីអង្កេត​និងតស៊ូ​មតិនៃ​អង្គការ​ខុមហ្វ្រែល បាន​ថ្លែងថា​ បើសិន​ជា​គណៈកម្មាធិការជាតិ​រៀបចំ​ការបោះ​ឆ្នោត​ (គ.ជ.ប) នៅ​តែ​បដិសេធ​ចំណុច​ដែល​ភាគី​ពាក់ព័ន្ធ​បាន​ស្នើ​ នោះវា​មិន​ខុសពី​ឆ្នាំ​ ២០២២ ទេ ដែល​បញ្ហា​ផ្សេងៗ​និង​អាច​កើតឡើង​ដដែលៗ សម្រាប់​ការ​បោះឆ្នោត​ថ្នាក់ជាតិ​នៅ​ខែកក្កដា​នេះ។ លោក​ថ្លែង​នៅ​ក្នុង​កម្មវិធី​ Hello VOA បន្ថែម​ថា បើសិន​ គ.ជ.ប ​មិន​ព្យាយាម​ធ្វើការ​ដោះ​ស្រាយ​នូវ​សំណើ​របស់​ភាគី​ពាក់ព័ន្ធ​ទេ នោះ​ការ​តវ៉ាក្រោយ​បោះ​ឆ្នោតនឹងនៅ​តែ​កើតមាន​ឡើង ហើយ​ទាំង​ប្រជាពលរដ្ឋ និង​ភាគី​ប្រកួត​ប្រជែង​មិនអស់​ចិត្ត ​និង​មិន​ស្ងប់​ចិត្ត៕ (ខាន់ សុគុំមនោ, Hello VOA, ភ្នំពេញ, ១៦ មករា ២០២៣)

រាជធានី​ភ្នំពេញ​ជា​ទីប្រជុំជន​បណ្តុំ​ដោយ​មជ្ឈមណ្ឌល​វប្បធម៌ ពាណិជ្ជកម្ម និង​នយោបាយ។ ប៉ុន្តែ​រាជធានី​ដែល​ស្ថិត​នៅ​ភូមិភាគ​កណ្តាល​នៃ​ប្រទេស​កម្ពុជា ហើយ​ស្ថិត​នៅ​ចំណុច​ប្រសព្វ​នៃ​ទន្លេសាប ទន្លេមេគង្គ និង​ទន្លេបាសាក់​នេះ បែរ​ជា​មិន​សូវ​សម្បូរ​ទីកន្លែង​សាធារណៈ​សម្រាប់​សុខុមាលភាព​របស់​ប្រជាជន​ទៅវិញ។ លោក សែស អរុណសក្តា អ្នកស្រាវជ្រាវ​ម្នាក់​ប្រចាំ​អង្គការ​វេទិកាអនាគត​ថ្លែង​ក្នុង​កម្មវិធី Hello VOA សំឡេង​ជំនាន់​ថ្មី​ថា កង្វះ​ទីធ្លា​សាធារណៈ​នៅ​រាជធានី​ភ្នំពេញ​ធ្វើ​ឱ្យ​ប៉ះពាល់​ដល់​សុខុមាលភាព​ប្រជាជន៕ (អ្នកនាង កាន់ វិច្ឆិកា, Hello VOA, ភ្នំពេញ, ៩ មករា ២០២៣)

អ្នកស្រី​ អាន​ ស៊ីណែត ជាកីឡាការិ​នី និងជា​ប្រធាន​ក្រុម​ជម្រើស​ជាតិ​បាល់​បោះ​ជិះ​រទេះ​ជនពិការកម្ពុជា។ អ្នកស្រី​បាន​ថ្លែង​ផ្តាំទៅ​ដល់​អ្នក​មាន​ពិការ​ភាព​ផ្សេងទៀត ឲ្យ​តាំងចិត្ត​មុតមាំ​ និង​ឲ្យ​ច្បាស់លាស់​លើអ្វី​ដែល​ខ្លួនធ្វើ ហើយ​ខំប្រឹងធ្វើឲ្យ​អស់​លទ្ធភាព​ក្នុងការជម្នះ​អស់​រាល់​ឧបសគ្គ។ អ្នកស្រី​ ស៊ីណែត ដែល​ពីមុន​មក​ធ្លាប់​ជា​អ្នកកាត់ដេរ ​ បាន​វិវត្ត​ខ្លួន​ក្លាយ​ជា​កីឡាការិនី​ឆ្នើម​ក្នុងក្រុម​ជម្រើសជាតិ​លេង​បាល់​បោះ​ជិះរទេះ​ជនពិការ​កម្ពុជា។ ​អ្នកស្រី​បាន​ថ្លែង​នៅ​ក្នុង​កម្មវិធី​ Hello VOA ស្ត្រី​និងភាព​ជា​អ្នក​ដឹកនាំ​ថា ការ​ផ្តល់​កម្លាំងចិត្ត ការ​ផ្តល់​យោបល់​ល្អៗ​ឲ្យ​គ្នា​ទៅវិញ​ទៅមក​ មិន​ថា​រវាង​អ្នកមាន​ពិការភាព ឬ​អ្នកគ្មាន​ពិការភាព​ មានសារៈសំខាន់​ខ្លាំងដើម្បី​គាំទ្រ​ដល់​ជនពិការ​ក្នុង​ការ​ស្វែងរក​និង​កសាង​ទេពកោសល្យ​របស់​ខ្លួន៕ (ខាន់ សុគុំមនោ​, Hello VOA, ភ្នំពេញ​, ០២ មករា ២០២៣)

តើ​សមាស​ភាព​គណៈ​រដ្ឋ​មន្ត្រី​បន្ត​វេន​របស់​គណបក្ស​ប្រជាជន​កម្ពុជា​នឹង​លេច​វត្តមាន​ច្រើន​ជាងមុន​មែន​ទេ​ក្នុង​ការ​បោះ​ឆ្នោត​ឆ្នាំ​ ២០២៣​ ខាង​មុខ? តើ​លោក​ ហ៊ុន ម៉ាណែត​ អាច​នឹង​កាន់​តួនាទី​អ្វី​ក្រោយ​ការ​បោះ​ឆ្នោត? ចុះ​សម្រាប់​បក្ស​ភ្លើង​ទៀន​វិញ​ នឹង​មាន​ជំហាន​នយោបាយ​បែប​ណា​ឆ្ពោះ​ទៅ​ការ​បោះ​ឆ្នោត? នៅ​ក្នុងកម្មវិធី Hello VOA ប្រចាំ​ខែ​ ក្រោម​ប្រធានបទ «អាស៊ាន» លោក​សាស្ត្រាចារ្យ ឯម សុវណ្ណារ៉ា អ្នក​ជំនាញ​វិទ្យា​សាស្ត្រ​នយោបាយ​ បាន​ចូល​មក​អន្តរាគមន៍ វិភាគ​និង​ពន្យល់​ពី​សំណួរ​ចម្បងៗ​ខាង​លើ៕ (អូន ឆេងប៉រ, Hello VOA, ប៊ែរឡាំង, ២៩ ធ្នូ ២០២២)

ពលករ​កម្ពុជា​យ៉ាងហោចណាស់ ២ លាននាក់ កំពុង​រស់នៅ និង​ធ្វើការ​នៅ​ក្រៅ​ប្រទេស ក្នុងនោះ​ជាង​មួយ​លាន​នាក់​នៅ​ប្រទេស​ថៃ។ កាលពី​ខែកញ្ញា ឆ្នាំ ២០១៩ រដ្ឋាភិបាល​កម្ពុជា​បាន​ជំរុញ​ប្រទេស​សមាជិក​អាស៊ាន​មួយចំនួន​ឱ្យ​ផ្តល់​សេវា​ព្យាបាល​ឥតគិតថ្លៃ​ដល់​ពលករ​ចំណាកស្រុក តាម​គំនិត​ផ្តួចផ្តើម​របស់​អាស៊ាន ដែល​ចាត់ទុក​ការអនុវត្ត​សិទ្ធិ​ការងារ ការគំាពារ​សង្គម ជា​ការអនុវត្ត​សិទ្ធិ​មនុស្ស។ លោក លឹង សុផុន មន្ត្រី​សិទ្ធិ​ការងារ​ទទួល​បន្ទុក​ពលករ​ចំណាកស្រុក​នៃ​អង្គការ​សង់ត្រាល់​ប្រចាំ​ប្រទេស​ថៃ ថ្លែង​ក្នុង​កម្មវិធី Hello VOA ថា កម្មវិធី​កិច្ចគាំពារ​សង្គម​អាច​ជួយ​ឱ្យ​ពលករ​ដែល​កំពុង​ធ្វើ​ចំណាកស្រុក​នៅ​ក្រៅ​ប្រទេស ទទួល​បាន​អត្ថប្រយោជន៍​ទាំងពេល​កំពុង​ធ្វើការ និង​ក្រោយ​ត្រឡប់​មក​ប្រទេស​ដើម​វិញ៕ (អ្នកនាង កាន់ វិច្ឆិកា, ភ្នំពេញ, ២២ ធ្នូ ២០២២)

លោក​ មាស នី អ្នក​ស្រាវជ្រាវការ​អភិវឌ្ឍ​សង្គម​ បាន​មើល​ឃើញ​ថា​ ការ​បោះ​ឆ្នោត​នៅក្នុង​ឆ្នាំ​ ២០២៣ ​នឹង​មិនមានអ្វី​ប្រែប្រួល​ផ្លាស់ប្តូរ​ច្រើន​ទេ​ពី​អាណត្តិ​មុនៗ ដោយ​លោក​អះអាង​ថា​មិនទាន់​ឃើញមាន​គណបក្ស​ណា​មួយ​ ដែលអាច​នឹង​ចូល​ប្រកួតប្រជែង​ដោយ​មាន​ឥទ្ធិពល​ប្រហាក់​ប្រហែល​គ្នា​នឹង​គណបក្ស​កាន់អំណាច​បាន​នៅ​ឡើយ។​ លោក​ថា​ លុះ​ណា​តែ​មាន​ភាព​ចៃដន្យ​ណា​មួយ ដែល​អ្នក​នយោបាយខាង​គណបក្ស​ក្រៅពី​គណបក្ស​កាន់​អំណាច អាច​រៀប​ចំ​ខ្លួន​រួបរួមគ្នា​បាន​រហ័ស​ ដូចអ្វី​ដែលគណបក្ស​សង្គ្រោះជាតិបាន​ធ្វើ​ឡើង​កាលពី​មុន​ការបោះ​ឆ្នោត​ឆ្នាំ​ ២០១៣៕ (ខាន់ សុគុំមនោ​, Hello VOA, ភ្នំពេញ​, ១៩ វិច្ឆិកា ២០២២)

ការ​ជ្រើស​រើស​មុខវិជ្ជា​ ​ជំនាញ​ និង​ការ​ស្វែង​រក​ឱកាសការងារ នៅ​តែ​ជា​បញ្ហាប្រឈមរបស់​សិស្ស​និង​និស្សិត​នៅ​កម្ពុជា ​ក្នុង​អំឡុង​ពេល​ដែល​ពួកគេ​កំពុង​សិក្សា និង​ទើប​បញ្ចប់​ការ​សិក្សា។ ថ្មីៗនេះ គម្រោងមួយមាន​ឈ្មោះ​ថា មាគ៌ា ដែលត្រូវបាន​បង្កើត​ឡើង​ដោយ​យុវជន បាន​និង​កំពុង​គាំទ្រ​ដល់​សិស្ស​វិទ្យាល័យ និង​និស្សិត​សាកលវិទ្យាល័យ ​ឲ្យ​ចូលរួម​ក្នុង​ព្រឹត្តិការណ៍​ផ្សេងៗ និង​ទទួល​បាន​ឱកាស​ដើម្បី​អភិវឌ្ឍន៍​ជំនាញ និង​បង្កើត​បទពិសោធន៍។ លោក ឈឹម នព្វន្ត អ្នកដឹកនាំ​គម្រោង​មាគ៌ា ​ថ្លែង​ក្នុងកម្មវិធី Hello VOA សំឡេង​ជំនាន់​ថ្មី​ថា បទពិសោធន៍ និង​ជំនាញ​ទន់ជួយ​ឱ្យ​យុវជន​ងាយ​ទទួល​បានជោគ​ជ័យ​ក្នុង​ការងារ៕ (កាន់ វិច្ឆិកា, Hello VOA, ភ្នំពេញ, ១២ ធ្នូ ២០២២)

កម្ពុជា​នឹង​រៀបចំ​ការ​បោះឆ្នោត​ថ្នាក់​ជាតិ នាថ្ងៃទី២៣ ខែកក្កដា ឆ្នាំ២០២៣ ខាងមុខ។ អ្នកស្រី ប្រុក វ៉ាន្នី ប្រធាន​គណៈកម្មាធិការ​ដោះស្រាយ​វិវាទ និង​វិន័យ​របស់​គណបក្ស​ប្រជាធិបតេយ្យ​មូលដ្ឋាន​ បាន​ថ្លែង​ថា​ អ្នកស្រី​បារម្ភ​អំពី​ជម្លោះ​នយោបាយ​កើត​ឡើង​នៅ​មុន​ការ​បោះឆ្នោត​ថ្នាក់​ជាតិ​នា​ពេល​ខាង​មុខ៕ (ស៊ុន ណារិន, Hello VOA, ភ្នំពេញ, ៨ ធ្នូ ២០២២)

អ្នកនាង លឹម លីដា ជា​សហស្ថាបនិក និង​ជា​ទីប្រឹក្សា​បច្ចេកទេស​នៃ​ស៊ីអ៊ិនវេសមិន (SHEInvestment) ប្រាប់​វីអូអេ​ថា ក្រៅពី​ការផ្តល់​ទុន​វិនិយោគ​ទៅ​លើ​អាជីវកម្ម​ដែល​ដឹកនាំ​ដោយ​ស្ត្រី ការផ្តល់​ចំណេះដឹង និង​ជំនាញ​ក្នុង​ការគ្រប់គ្រង​ហិរញ្ញវត្ថុ ជំនាញ​បច្ចេកវិទ្យា (បែបឌីជីថល) និង​ជំនាញ​ដទៃទៀត​ដល់​ពួកគេ គឺជា​គន្លឹះ​ក្នុង​ការគាំទ្រ​ដល់​សហគ្រិន​ស្ត្រី នៅក្នុង​ការពង្រីក​អាជីវកម្ម​ពួកគេ។ អ្នកនាង​មាន​ក្តីស្រមៃ​ថា នា​ពេល​អនាគត នឹង​មាន​ស្ត្រី​កម្ពុជា​ដែល​ជា​ម្ចាស់​អាជីវកម្ម​ជាច្រើន ចូលរួម​ផ្តល់​គំនិត​យោបល់​ក្នុង​គោលនយោបាយ​ជាតិ​សម្រាប់​វិស័យ​សហគ្រិនភាព ហើយ​ពួកគេ​មាន​ភាពក្លាហាន​បង្ហាញ​បទពិសោធន៍​ខ្លួន​ក្នុង​វេទិកា​ជាតិ និង​អន្តរជាតិ​ស្តីពី​សហគ្រិន៕ (អ្នកនាង​ខាន់ សុគុំមនោ, Hello VOA, ភ្នំពេញ, ៥ ខែធ្នូ ឆ្នាំ២០២២)

ក្នុងកម្មវិធី Hello VOA ប្រចាំ​ខែ​ ក្រោម​មូលបទ «អភិបាលកិច្ចល្អ» ដែល​ចាក់ផ្សាយ​កាលពីរាត្រីថ្ងៃចន្ទ ទី២៨ ខែវិច្ឆិកា ឆ្នាំ២០២២ លោក ឱក សេរីសោភក្ដិ៍ អ្នក​ឯកទេស​អភិបាលកិច្ច បាន​បកស្រាយ​អំពី​ចរន្ត​ប្រែ​ប្រួល​នយោបាយ​អន្តរ​ជាតិ​ ក្រោយ​ការ​បិទ​បញ្ចប់​កិច្ច​ប្រជុំ​កំពូល​អាស៊ាន​និង​កិច្ច​ប្រជុំ​ពាក់​ព័ន្ធ​នៅ​រាជធានី​ភ្នំពេញ កាល​ពី​ដើម​ខែ​វិចិ្ឆកា ​ឆ្នាំ​ ២០២២​ កន្លង​ទៅ​នេះ៕ (អូន ឆេងប៉រ, Hello VOA, ប៊ែរឡាំង, ២៨ វិច្ឆិកា ២០២២)

ពលករ​កម្ពុជា​យ៉ាងហោចណាស់​ជាង​មួយ​លាន​នាក់​ បាន​និង​កំពុង​ធ្វើ​ចំណាក​ស្រុក​ទៅ​ធ្វើការ​នៅក្រៅ​ប្រទេស។ ពលករ​ចំណាក​ស្រុក​ខ្មែរ​ភាគ​ច្រើន​ធ្វើ​ការ​ក្នុង​វិស័យ​កសិកម្ម​សំណង់​អ្នក​បម្រើ​តាម​ផ្ទះ​សេវាកម្ម​ឧស្សាហ​កម្ម​ផលិតកម្ម​ និង​ចិញ្ចឹម​សត្វ។​ ពួក​គេ​ភាគ​ច្រើន​ទទួល​បាន​ប្រាក់​ចំណូល​មិន​គ្រប់គ្រាន់ ​ហើយ​ជាប់​បំណុល​ធនាគារ។​ លោក​ ប៉ាល់ ចំរើន អ្នកស្រាវជ្រាវ​ជំនាញ​ផ្នែក​សុខភាព​សាធារណៈ​ថ្លែង​ក្នុង​កម្មវិធី Hello VOA ស្តី​ពី​ពលករ​ចំណាក​ស្រុក​ថា ភាគ​ច្រើន​នៃ​ពលករ​ចំណាក​ស្រុកខ្មែរ​មាន​ជំងឺ​ផ្លូវ​ចិត្ត ដោយសារបរិយាកាស​រស់នៅ និង​សម្ពាធ​ការងារ។​ (អ្នកនាង កាន់ វិច្ឆិកា, ភ្នំពេញ, ២៤ វិច្ឆិកា ២០២២)

ប្រធាន​គណបក្ស​ខ្មែរ​រួបរួម​ជាតិ​លោក​ ញឹក ប៊ុនឆៃ​ បានឲ្យ​ដឹងថា​ គណបក្ស​របស់​លោក​កំពុង​តែ​មមាញឹក​រៀបចំ និង​ពង្រឹង​រចនាសម្ព័ន្ធ​នៅ​មូលដ្ឋាន​ ក្រោយ​មាន​ការ​ចុះចូល​ពី​សមាជិក​គណបក្ស​ផ្សេងៗ និង​ការ​រួបរួម​ជាមួយ​នឹង​គណបក្ស​កម្ពុជា​និយម​របស់​លោក យ៉ែម​ បុញ្ញឫទ្ធិ។ លោក ញឹក ប៊ុនឆៃ បាន​បញ្ជាក់​ថា គណបក្ស​ខ្មែរ​រួបរួម​ជាតិ​ ផ្តោត​អាទិភាព​លើ​ខេត្ត​ធំៗ​តែ ៥ ប៉ុណ្ណោះ​ ដើម្បី​ប្រឹងប្រែង​ខិតខំ​ធ្វើ​យ៉ាងណា​ឲ្យទទួល​បាន​អាសនៈ​ពី​ការ​បោះឆ្នោតថ្នាក់​ជាតិ​នា​ឆ្នាំ ២០២៣ ខាង​ពេលមុខ​នេះ៕ (ខាន់ សុគុំមនោ​, Hello VOA, ភ្នំពេញ, ២១ វិច្ឆិកា ឆ្នាំ២០២២)

បញ្ហា​ផ្លូវ​ចិត្តនៅ​តែ​ជា​ប្រធាន​បទ​ដែល​ត្រូវ​បាន​ប្រជាពលរដ្ឋ ជាពិសេស​យុវជនយក​មក​ជជែក និង​ស្វែង​យល់​បន្ថែម បន្ទាប់​ពី​មាន​មនុស្ស​មួយ​ចំនួន​ត្រូវ​បាន​អ្នកជំនាញ​អះអាង ថា​ កំពុង​ប្រឈម​នឹង​បញ្ហា​ផ្លូវចិត្ត ហើយ​ឈាន​ដល់​ការធ្វើ​អត្តឃាតជាដើម។ ថ្មីៗ​នេះ អ្នក​ជំនាញ​មួយចំនួន​បាន​ប្រើប្រាស់​សិល្បៈ​ធ្វើ​ជា​វិធី​មួយ​ក្នុង​ការ​ព្យាបាល​ផ្លូវចិត្ត។ កញ្ញា រី មុនីសុវណ្ណយ៉ា ស្ថាបនិក​និងជាប្រធានគ​ម្រោង​សិល្បៈនិង​សុខភាព​ផ្លូវចិត្ត ​ថ្លែង​ក្នុងកម្មវិធី Hello VOA សំឡេង​ជំនាន់​ថ្មី​ថា សិល្បៈ​អាច​ជួយ​កាត់បន្ថយ​បញ្ហា​ផ្លូវ​ចិត្ត​សម្រាប់​អ្នក​មានវិបត្តិ​ផ្លូវ​ចិត្ត​កម្រិត​ស្រាល៕ (កាន់ វិច្ឆិកា, Hello VOA, ភ្នំពេញ, ១៤ វិច្ឆិកា ២០២២)

កម្ពុជា​នឹង​រៀបចំ​ការបោះឆ្នោត​ថ្នាក់​ជាតិ នៅថ្ងៃ​ទី២៣ ខែកក្កដា ឆ្នាំ ២០២៣ ខាងមុខ។ លោក យ៉ែម បុញ្ញឫទ្ធិ ស្ថាបនិក និង​ជា​អតីត​ប្រធាន​គណបក្ស​កម្ពុជា​និយម បាន​ថ្លែង​ថា នៅ​មាន​ភាពមិន​ប្រក្រតី​មួយ​ចំនួន​ដែល​រដ្ឋាភិបាល​ត្រូវ​កែលម្អ ដើម្បី​ធានា​ថា ការបោះឆ្នោត​មួយ​អាច​ទទួល​យក​បាន។ លោក​ថ្លែង​បន្ថែម​ថា គំនាប​ផ្លូវចិត្ត​លើ​អ្នក​បោះឆ្នោត​នៅតែ​ជា​បញ្ហា ដូចជា​ករណី​បើ​ពលរដ្ឋ​មិន​បោះឆ្នោត​ឱ្យ​គណបក្ស​កាន់​អំណាច មាន​ការលើក​ឡើង​ថា ពួកគេ​នឹង​ត្រូវបាន​ដក​បណ្ណក្រីក្រ វត្តមាន​មេភូមិ ឬ​អាជ្ញាធរ​មូលដ្ឋាន​នៅ​ជិត​ការិយាល័យ​បោះឆ្នោត និង​ការលើក​ឡើង​ថា បោះ​ឱ្យ​អ្នក​ណា ក៏​គេ​ដឹង និង​ការគំរាម​ថា សង្គ្រាម​អាច​មាន​ជាដើម បើ​គណបក្ស​ប្រជាជន​កម្ពុជា​ចាញ់​ការបោះឆ្នោត៕ (ស៊ុន ណារិន, Hello VOA, ភ្នំពេញ, ១០ វិច្ឆិកា ២០២២)

អ្នកស្រី ហួត សុជាតា មាន​បទពិសោធន៍​ជាង​មួយ​ទសវត្សរ៍​ពី​ផ្នែក​គ្រប់គ្រង​បោះពុម្ព​ផ្សាយ​សៀវភៅ​នៅ​អង្គការ​ស៊ីប៉ា និង​ធ្លាប់​សហការ​ជាមួយ​នឹង​មិត្តភក្តិ​របស់​ខ្លួន​បង្កើត​គ្រឹះស្ថាន​បោះ​ពុម្ព​ «កម្ពុមេរា»។ ថ្មីៗ​នេះ អ្នកស្រី​បាន​បង្កើត​គ្រឹះស្ថាន​បោះពុម្ព​ថ្មី​មួយ​ទៀត​ឈ្មោះ​ថា «អវតា» ក្នុង​គោលបំណង​ពាំនាំ​នូវ​ប្រលោម​លោក​ប្រភេទ​ផ្សេងៗ​ទៀត​ឱ្យ​សម្បូរបែប ក្រៅតែ​អំពី​ប្រលោម​លោក​បែប​ស្នេហា និង​សៀវភៅ​រឿង​បែប​ជីវប្រវត្តិ។ ហើយ​គ្រឹះស្ថាន​របស់​អ្នក​ស្រី​បាន​រៀបរៀង​បោះពុម្ព​សៀវភៅ​ប្រលោម​លោក​បែប​ស៊ើប​អង្កេត​ល្បីល្បាញ​របស់​ចក្រភព​អង់គ្លេស​រឿង Sherlock Holmes ដែល​បាន​ចេញ​លក់​នៅ​លើ​ទីផ្សារ​ជា​ភាសា​ខ្មែរ ក្រោម​ចំណង​ជើង​ថា «ឃាតករ​មុខក្រហម»។ សៀវភៅ​នេះ​ត្រូវបាន​ប្រែសម្រួល​ដោយ​អ្នកស្រី ហួត សុជាតា ផ្ទាល់។ អ្នកស្រី​បាន​លើក​ឡើង​ថា​ ការ​បង្កើន​គុណភាព​សៀវភៅ​តាម​រយៈការ​រចនា​គម្រប​សៀវភៅ ការ​តុបតែង​ទំព័រ​ខាង​ក្នុង​នៃ​ផ្ទៃ​សៀវភៅ និង​ការជ្រើសរើស​សន្លឹក​សៀវភៅ​ជាដើម អាច​ធ្វើ​ឱ្យ​អ្នកអាន​មាន​បទពិសោធន៍​រីករាយ​ក្នុង​ការអាន និង​សម្រួល​ដល់​ភ្នែក​របស់​ពួកគេ។ ហើយ​នេះ​គឺជា​កិច្ចការ​ដ៏​សំខាន់​មួយ ដើម្បី​ទាក់ទាញ​ការអាន​សៀវភៅថែម​មួយ​កម្រិត​ទៀត៕ (អ្នកនាង ខាន់ សុគុំមនោ, Hello VOA ស្ត្រី​និង​ភាព​ជា​អ្នក​ដឹកនាំ, ភ្នំពេញ, ៧ វិច្ឆិកា ២០២២)