បទ​សម្ភាសន៍ - វីអូអេ

អង្គការ​យុវសន្តិភាព​ជា​អង្គការ​ដែល​បណ្តុះបណ្តាល​យុវជន​ឱ្យ​មាន​ភាព​ជា​អ្នកដឹកនាំ​ផង​និង​ចូលរួម​ក្នុង​ការដោះស្រាយ​បញ្ហា​សង្គម​មួយ​ចំនួន​ដែល​សេសសល់​ក្រោយ​សម័យ​ខ្មែរក្រហម​ផង។ លោក ម៉ន សុគឿន នាយក​ប្រតិបត្តិ​នៃ​អង្គការ​យុវសន្តិភាព​ថ្លែង​ថា យុវជន​មាន​តួនាទី​សំខាន់​ក្នុង​ការងារ​យូរអង្វែង​ជាច្រើន​នៅ​ក្រោយ​ការបញ្ចប់​ទៅ​នៃ​សាលាក្តី​ខ្មែរក្រហម ដូចជា​កិច្ចការ​បង្ការ​ការកើត​ឡើងវិញ​នូវ​របប​ប្រល័យ​ពូជសាសន៍ និង​ការថែរក្សា​ការចងចាំ​ប្រវត្តិសាស្ត្រ​នៅ​តាម​សហគមន៍។ លោក ម៉ន សុគឿន កំពុង​ចូលរួម​កម្មវិធី​បណ្តុះបណ្តាល​រយៈពេល​៣​ខែ រហូត​ដល់​ចុង​ខែ​មេសា ​នៅ​សាកល​វិទ្យាល័យ Binghamton រដ្ឋ New York សហរដ្ឋ​អាមេរិក ក្នុង​កម្មវិធី Charles E. Scheidt Resident Practitioner ប្រឆាំ​ឆ្នាំ២០២២-២០២៣។ សូម​លោក​អ្នកស្តាប់​បទសម្ភាសន៍​ទាំងស្រុង​រវាង​លោក សឹង សុផាត នៃ​វីអូអេ ជាមួយនឹង​លោក ម៉ន សុគឿន នៅ​រដ្ឋធានី​វ៉ាស៊ីនតោន​កាលពី​ថ្ងៃទី៦ ខែមេសា ឆ្នាំ២០២៣៕

អ្នក​ស្រី​ សុភីលីន​ ជាម សាភីរ៉ូ​ (Sophiline Cheam-Shapiro) ជាគ្រូ​របាំ​និង​អ្នក​ច្នៃ​របាំ​បុរាណ​និង​ទំនើប​ខ្មែរ​ម្នាក់។ អ្នក​ស្រី​ត្រូវ​បាន​អញ្ជើញ​មក​បុរី​ New York (​ញូវយ៉ក)​ថ្មីៗនេះ ដើម្បីចូល​រួម​ក្នុង​ការ​កិច្ច​ពិភាក្សា​និង​សម្ភោធ Podcast Dynamite Doug ស្តីអំពី​លោក Doughlas Latchford អ្នក​ជំនួញ​ជនជាតិ​អង់គ្លេស​ដែល​បាន​លួចជួញ​ដូរ​រូបចម្លាក់​បុរាណ​ខ្មែរជាច្រើន។ ​រូប​ចម្លាក់​ប្រហែល​៣០ ក្នុង​ចំណោមនោះ​កំពុង​ត្រូវបាន​តាំង​នៅ​ក្នុង​សារមន្ទីរ​សិល្បៈ Metropolitan ឬ Metropolitan Museum of Artក្នុង​បុរី New York។ ​កញ្ញា​ ទុំ ម្លិះ នៃ​វីអូអេ បាន​ជួប​សម្ភាសន៍​ជាមួយ អ្នក​ស្រី​ សុភីលីន​ ជាម សាភីរ៉ូ​ ក្រោយ​ពេល​អ្នកស្រីបាន​បង្ហាញ​ក្បាច់​រាំ​នៅ​ខាងមុខ​រូប​ចម្លាក់​លោកេស្វរៈ​ ដែលគេត្រូវ​បាន​ដាក់​តាំង​បង្ហាញ​នៅ​ក្នុង​សារមន្ទីរ​សិល្បៈ​ដ៏ធំ​បំផុត​នៅសហរដ្ឋ​អាមេរិកនេះ។ សូម​លោកអ្នកនាង​ស្តាប់​បទសម្ភាសន៍​នេះ​ដូច​តទៅ៖

ថ្ងៃទី៨ មីនា ជា​ថ្ងៃ​ដែល​ពិភពលោក​ប្រារព្ធ​ទិវា​សិទ្ធិនារី​អន្តរជាតិ។ អ្នកស្រី ធិត គឹមហ៊ុន ​ប្រធាន​កិច្ចការ​ស្ត្រី​គណបក្សសង្គ្រោះជាតិ​ប្រចាំ​សហរដ្ឋអាមេរិក កំពុង​ស្ថិត​នៅ​ក្នុង​រដ្ឋធានី​វ៉ាស៊ីនតោន​ដើម្បី​ចូលរូម​កិច្ចប្រជុំ​កំពូល​សិទ្ធិស្ត្រី​អន្តរជាតិ ដែល​រៀបចំឡើង​ដោយ​វិទ្យាស្ថាន​សាធារណរដ្ឋ​អន្តរជាតិ IRI និង​បណ្តាញ​ស្ត្រី​ប្រជាធិបតេយ្យ​ WDN។ អ្នកស្រី​បាន​ផ្តល់​បទសម្ភាស​ដល់​អ្នកនាង ស្រេង លក្ខិណា នៃ VOA អំពី​សិទ្ធិ​និង​តួនាទី​ស្ត្រី​ក្នុង​សង្គម៕

ក្នុង​រយៈ​ពេល​ប៉ុន្មាន​ថ្ងៃ​នេះ​មាន​ភាព​ចម្រូង​ចម្រាស​ទាក់ទង​បទ​ចម្រៀង​រ៉េប​«ឈាម​បាតុករ»​របស់​លោក ​គា សុគន្ធ​ ដែល​លោក​បាន​ច្រៀង​រៀប​រាប់​នូវ​ព្រឹត្តិ​ការណ៍​ ហិង្សា​តាម​ផ្លូវ​វេងស្រង ​កាលពី​ឆ្នាំ​២០១៤។ ​មេ​ដឹកនាំ​អង្គការ​សង្គម​ស៊ីវិល​មួយ​ចំនួន​ត្រូវ​បាន​សមត្ថ​កិច្ច​កោះ​ហៅ​សាកសួរ ​និង​ព្រមាន​ឲ្យ​លុប​ចោល​បទ​ចម្រៀងនេះ​ពី​បណ្តាញ​សង្គម​របស់​ស្ថាប័ន​ខ្លួន។​ នៅ​ក្នុង​បទ​សម្ភាសន៍​ជាមួយ​វីអូអេ​នា​ថ្ងៃ​ពុធ​នេះ លោក​ គា សុគន្ធ​ ដែល​ជា​អ្នក​និពន្ធ​ និង​ច្រៀង​ចម្រៀង​រ៉េប​នេះ ​បានការពារ​បទ​ចម្រៀង​មួយ​នេះ​ថា ​មិនមាន​ចរិត​ញុះញង់​ដូច​ការ​ចោទ​ប្រកាន់​របស់​អាជ្ញាធរ​ឡើយ។ សូម​ស្តាប់​នូវ​បទ​សម្ភាសន៍​រវាង​លោក ​លាស់ លីបលីប ​នៃ​វីអូអេ ​ជាមួយ​លោក​ គា សុគន្ធ​ ​ម្ចាស់​បទចម្រៀង​«ឈាម​បាតុករ»​ ដូច​ត​ទៅ៕

លោក​ Joe Biden (ចូ បៃដិន) ​ប្រធានាធិបតី​អាមេរិក​បាន​ធ្វើ​ដំណើរមក​ដល់​កម្ពុជា​ ហើយ​ដើម្បី​ចូលរួម​កិច្ច​ប្រជុំ​កំពូល​អាមេរិក-អាស៊ាន​ ដូច​មេ​ដឹក​នាំ​ពិភព​លោក​ផ្សេង​ទៀត​ និង​លោក​អគ្គលេខាធិការ​អង្គការ​សហ​ប្រជាជាតិ​ផង​ដែរ។ កិច្ច​ប្រជុំ​ទាំងនេះ​រំពឹង​ថា ​នឹង​ពិភាក្សា​លើ​បញ្ហា​ប្រឈម​ក្នុង​តំបន់​ និង​សាកល។ ​លោក​ សុខ ខេមរា​ នៃ​វីអូអេ​ដែល​កំពុង​ចុះ​យក​ព័ត៌មាន​ផ្ទាល់​នៅ​ក្នុង​ពេល​កិច្ច​ប្រជុំ​កំពូល​អាស៊ាន​ និង​កិច្ច​ប្រជុំ​កំពូល​ពាក់ព័ន្ធ​ ជូន​កិច្ច​សន្ទនា​ជាមួយ​អ្នក​នាង​ កាន់​ វិច្ឆិកា​ ដូចតទៅ៖

ប្រធានាធិបតីសហរដ្ឋ​អាមេរិក​លោក Joe Biden ​នឹង​ចូលរួម​កិច្ច​ប្រជុំ​កំពូល​ជាមួយ​នឹង​មេដឹកនាំ​អាស៊ាន​ដែល​រៀបចំ​នៅ​រាជធានី​ភ្នំពេញ​នៅ​ថ្ងៃសៅរ៍​នេះ។ ក្នុង​នោះ​ដែរ​ក៏​នឹង​លោក​ប្រធានាធិបតី​ក៏​នឹង​ជួប​ពិភាក្សា​ទ្វេភាគី​ជាមួយ​នឹង​លោក​ ហ៊ុន សែន​ នាយក​រដ្ឋមន្ត្រី​កម្ពុជា​ក្នុង​ឋានៈ​ជា​ប្រធាន​ប្តូរវេន​សមាគម​អាស៊ាន។ នេះ​បើ​តាម​ការ​បញ្ជាក់​របស់​មន្ត្រី​សហរដ្ឋ​អាមេរិក។​ លោក​សម រង្ស៊ី​ប្រធាន​ស្តីទី​គណបក្ស​សង្គ្រោះ​ជាតិ​ដែល​កំពុង​រស់​នៅ​និរទេស​ខ្លួន​ក្រៅ​ប្រទេស​ទទូច​ឲ្យ​លោក ​Biden ​ផ្តោត​លើការ​នាំ​យក​លទ្ធិ​ប្រជាធិបតេយ្យ​ត្រឡប់​មក​កម្ពុជា​វិញ​និង​រក្សា​ការពារ​អធិបតេយ្យ​របស់​កម្ពុជា​ទល់​នឹង​ការពង្រីក​ឥទ្ធិពល​កាន់តែ​ធំ​របស់​មហាអំណាច​ចិន។ លោក ម៉ែន គឹមសេង​ នៃ​វីអូអេ​បាន​សម្ភាស​លោក សម រង្ស៊ី​ នៅ​ថ្ងៃសុក្រ​នេះ​ដូចតទៅ៖

អាស៊ានដែលកម្ពុជាធ្វើជាម្ចាស់ផ្ទះ ចាំបាច់ត្រូវពង្រឹងឥទ្ធិពល និង សាមគ្គីភាពនៅពេលមានការប្រកួតប្រជែងអំណាចយ៉ាងស្រួចស្រាល់ និង ប្រឈមជាមួយបញ្ហាស្មុគស្មាញខ្លាំង។ លោក សុខ ខេមរា នៃវីអូអេ បានធ្វើកិច្ចសម្ភាសន៍ជាមួយលោក បណ្ឌិត ឈាង វណ្ណារិទ្ធ ប្រធានវិទ្យាស្ថានចក្ខុវិស័យអាស៊ី អំពីដំណើរការនៃកិច្ចប្រជុំ និងការប្រជែងអំណាចរវាងសហរដ្ឋអាមេរិកនិងចិន បញ្ហាវិបត្តិភូមា ហើយនិងបញ្ហាមួយចំនួនទៀតដែលត្រូវគ្របដណ្តប់លើកិច្ចប្រជុំកំពូលអាស៊ានលើកទី៤០ និង ៤១ នៅក្នុងខែវិច្ឆិកា ឆ្នាំ២០២២ ដែលកម្ពុជាធ្វើជាម្ចាស់ផ្ទះ៕

មេដឹកនាំ​ខ្មែរ​កម្ពុជាក្រោមដែល​ធ្វើការ​តស៊ូមតិ​ប្រឆាំងនឹង​ការរំលោភ​សិទ្ធិមនុស្ស​របស់​វៀតណាម​ បាន​សម្តែង​ការខកចិត្ត​ចំពោះការ​ជាប់ឆ្នោត​ជាសមាជិក​ក្រុមប្រឹក្សាសិទ្ធិ​មនុស្ស​អង្គការ​សហប្រជាជាតិ ​របស់​វៀតណាម។ លោក​ប្រាក់ សេរីវុឌ្ឍ ប្រធាន​សហព័ន្ធ​ខ្មែរ​កម្ពុជា​ក្រោម​នៅ​សហរដ្ឋ​អាមេរិក​ បាន​ថ្លែង​ប្រាប់ ​វីអូអេ​ថា ​វៀតណាម​ជា​ប្រទេស​រំលោភ​សិទ្ធិមនុស្ស ​មិនគួរ​ណាក្លាយ​ជា​សមាជិក​នៃក្រុមប្រឹក្សា​សិទ្ធិមនុស្ស​ទេ​ ហើយ​ថាលោកនឹង​បន្តការ​តស៊ូមតិ​ទៅមុខទៀត​ទោះជា​វៀតណាម​ត្រូវ​ប្រទេស​ចំនួន​១៤៥​ លើ ១៨៩​ បាន​បោះឆ្នោត​ឲ្យ​វៀតណាម​ក្លាយជា​សមាជិក​ក្រុមប្រឹក្សា​សិទ្ធិមនុស្ស​កាលពី​ថ្ងៃទី១១ ខែតុលា​នៅឯ​បុរីញូវយ៉ក​ក្តី។ សូមស្តាប់​កិច្ចសម្ភាសន៍​រវាង​លោក​ សុខ ខេមរា ​នៃ​ វីអូអេ ជាមួយ​លោក​ ប្រាក់ សេរីវុឌ្ឍ ដូចតទៅ៕

មេដឹកនាំ​ខ្មែរ​កម្ពុជា​ក្រោម​បាន​ធ្វើ​ចលនា​ទាមទារ​ដល់​ប្រទេស​ជា​ច្រើន​រួម​ទាំង​កម្ពុជា​ផង​កុំឲ្យ​គាំទ្រ​វៀតណាម​ជា​សមាជិក​ក្រុមប្រឹក្សា​សិទ្ធិមនុស្ស​អង្គការ​សហប្រជាជាតិ ​នៅមុន​ពេល​មាន​ការ​បោះឆ្នោត​គាំទ្រ​ឬមិន​គាំទ្រ​វៀតណាម​ជា​សមាជិក​នៃ​ក្រុមប្រឹក្សា​សិទ្ធិមនុស្ស​នេះ ​នៅថ្ងៃទី​១១ ​ខែតុលា​ ឆ្នាំ​២០២២។ លោក​ ប្រាក់ សេរីវុឌ្ឍ ​ប្រធាន​សហព័ន្ធ​ខ្មែរកម្ពុជា​ក្រោម​នៅ​សហរដ្ឋ​អាមេរិក​ ថ្លែង​យ៉ាងដូច្នេះ ​ដោយ​លោក​បាន​អះអាង​ថា ប្រទេស​វៀតណាម​ជា​ប្រទេស​មាន​ប្រវត្តិ​រំលោភ​សិទ្ធិ​មនុស្ស​ខ្លាំង ​ដែល​មិនគួរ​នឹង​ទទួល​បាន​ការគាំទ្រ​នោះទេ។ សូម​លោក​អ្នក​ស្តាប់​កិច្ចសម្ភាសន៍​នេះ​រវាង​លោក​ សុខ ខេមរា​ នៃ​វីអូអេ​ និង ​លោក​ ប្រាក់ សេរីវុឌ្ឍ​ ដូចតទៅ៕

នៅ​ក្នុង​អំឡុង​ពេល​មួយ​រយៈ​កន្លង​មក​នេះ ​មាន​សារ​ព័ត៌មាន​ក្នុង​ស្រុក​និង​ក្រៅ​ស្រុក​ជាច្រើន បាន​ចុះ​ផ្សាយ​អំពី​ការ​ជួញ​ដូរ​មនុស្ស​និង​បង្ខាំង​មនុស្ស​ខុស​ច្បាប់​នៅ​ក្នុង​ប្រទេស​កម្ពុជា​ ស្រប​ពេល​ដែល​សហរដ្ឋ​អាមេរិក​បាន​ទម្លាក់​កម្ពុជា​ពី​ចំណាត់​ថ្នាក់កម្រិត​ពីរ​ (Tier 2) មក​កម្រិត​បី ​(Tier 3) ដែល​ជាចំណាត់​ថ្នាក់​ទាប​បំផុត​មួយ​ក្នុង​ការ​ទប់ស្កាត់​អំពើ​ជួញដូរ​មនុស្ស។ អ្នក​ស្រី ​ធីតា​ វីន ​បាន​ជួប​សម្ភាសន៍​ផ្ទាល់​ជាមួយ​លោក​ស្រី ​ជូ ​ប៊ុន​អេង​ រដ្ឋ​លេខា​ធិការ​ក្រសួង​មហា​ផ្ទៃ​និង​ជា​អនុ​ប្រធាន​អចិន្រ្តៃយ៍​នៃ​គណៈ​កម្មាធិការ​ជាតិ​ប្រយុទ្ធ​ប្រឆាំង​អំពើ​ជួញ​ដូរ​មនុស្ស​ ជុំ​វិញ​ការ​ជួញ​ដូរ​មនុស្ស ​និង​បង្ខាំង​មនុស្ស​ខុស​ច្បាប់​នៅ​កម្ពុជា។ លោក​ស្រី ​ជូ​ ប៊ុន​អេង ​បាន​ឱ្យ​ដឹង​ថា ​ការ​ជួញ​ដូរ​មនុស្ស ​និង​បង្ខាំង​មនុស្ស​ខុស​ច្បាប់ ​គឺ​ជា​ការ​រួម​គ្នា​ ទទួល​ខុស​ត្រូវ​ជាមួយ​បណ្តាល​ប្រទេស​ពាក់​ព័ន្ធ ​ដែល​យើង​ចាំ​បាច់​ត្រូវ​ធ្វើ​ការ​សហ​ការ​គ្នា ​ដោយ​យើង​មិន​អាច​ចង្អុល​ថា​ ជា​កំហុស​របស់​ប្រទេស​ណា​មួយ​នោះ​ទេ៕

ខេត្ត​ព្រះ​សីហនុ​ត្រូវ​បាន​គេ​ដឹង​ថា​ មាន​ជន​ជាតិ​ចិន​ទៅ​ធ្វើ​ការ​វិនិយោគ​ច្រើន​ជាង​បណ្តា​ខេត្ត​ផ្សេងៗ​នៅ​ក្នុង​ប្រទេស​កម្ពុជា។ បច្ចុប្បន្ន ​ខេត្ត​មួយ​នេះ​ បាន​ក្លាយ​ជា​ទីតាំង​ដ៏​ធំ​មួយ​របស់​ក្រុមជួញ​ដូរ​មនុស្ស។ អ្នក​ស្រី ​ធីតា​ វីន បាន​ជួប​សម្ភាសន៍​ផ្ទាល់​ជាមួយ​លោក​ ឡុង ​ឌីម៉ង់​ អភិបាល​រង​ខេត្ត​ព្រះ​សី​ហនុ អំពីការ​ជួញ​ដូរ​មនុស្ស ​ឬ​បង្ខាំង​មនុស្ស​ខុស​ច្បាប់​ នៅ​ក្នុង​ខេត្ត​ជាប់​ឆ្នេរ​សមុទ្រ​មួយ​នេះ។ លោក ​ឡុង​ ឌីម៉ង់ ​បាន​ឱ្យ​ដឹង​ថា​ ការ​បង្ក្រាប​ការ​ជួញ​ដូរ​មនុស្ស ​និង​បង្ខាំង​មនុស្ស​ខុស​ច្បាប់​ គឺ​ជា​ភារកិច្ច​រួម​គ្នា ​ដែល​តម្រូវ​ឱ្យ​មាន​ការ​ចួល​រួម​ពី​គ្រប់​ភាគី​ពាក់​ព័ន្ធ​ទាំង​អស់ ​ទើប​មាន​ប្រសិទ្ធ​ភាព៕

រយៈពេល​ប៉ុន្មាន​ឆ្នាំ​ចុង​ក្រោយ​នេះ​ គេ​សង្កេត​ឃើញ​ថា​ ប្រទេស​កម្ពុជា​បាន​ក្លាយ​ជា​ប្រទេស​គោល​ដៅ​ក្នុង​ការ​ជួញ​ដូរ​មនុស្ស​ និង​បង្ខាំង​មនុស្ស​ខុស​ច្បាប់ ​បន្ទាប់​ពី​មាន​ការ​កើន​ឡើង​នៃ​លំហូរ​ជនជាតិ​ចិន​ មក​វិនិយោគ​ក្នុង​ប្រទេស។ អ្នក​ស្រី ធីតា​ វីន ​បាន​ជួបសម្ភាសន៍​ផ្ទាល់​ជាមួយ​លោក ​មឿន ​តុលា​ នាយក​ប្រតិបត្តិ​មជ្ឈ​មណ្ឌល​សម្ព័ន្ធ​ភាព ​ការងារ ​និង​សិទ្ធិ​មនុស្ស ​ហៅ​កាត់​ថា ​សង់​ត្រាល់​ ជុំ​វិញ​ការ​ជួញ​ដូរ​មនុស្ស ​និង​បង្ខាំង​មនុស្ស​ខុស​ច្បាប់​នៅ​កម្ពុជា។ លោក ​មឿន ​តុលា ​បាន​ឱ្យ​ដឹង​ថា ​ការ​កើន​ឡើង​នូវ​ការ​ជួញ​ដូរ​មនុស្ស ​និង​ការ​បង្ខាំង​មនុស្ស​ខុស​ច្បាប់ ​នៅ​ក្នុង​ប្រទេស​កម្ពុជា​មួយផ្នែកដោយ​សារ​ការ​អនុវត្ត​ច្បាប់​មាន​ភាព​ធូរ​រលុង​ ហើយ​ចំណាត់​ការ​ធ្វើ​ឡើង​តាម​ការបញ្ជា​ពី​ថ្នាក់​លើ​តែ​ប៉ុណ្ណោះ៕

អ្នក​ដឹកនាំ​ក្រុម​អ្នក​សារព័ត៌មាន​ឯករាជ្យ​នៅ​កម្ពុជា ​បាន​ទទូច​ថា​អនុសាសន៍​របស់​អង្គការ​សហប្រជាជាតិ ទាក់ទង​នឹង​សេរីភាព​ព័ត៌មាន​នៅ​កម្ពុជា​គឺជា​រឿង​សំខាន់​ដែល​អាជ្ញាធរ​កម្ពុជា​មិន​គួរ​បដិសេធ​នោះ​ទេ។ លោក​បាន​ទទូច​ថា​អនុសាសន៍​ដ៏​មាន​សារ:សំខាន់​ក្នុង​របាយការណ៍​ចុង​ក្រោយ​កាល​ពី​ដើម​ខែ​សីហា ឆ្នាំ២០២២ គួរ​ត្រូវ​បាន​គិតគូរ​និង​កែលម្អ​ជា​ពិសេស​ការ​បញ្ចប់​រឿងក្តី​ព្រហ្មទណ្ឌ​ប្រឆាំងនឹង​អ្នក​សារព័ត៌មាន​ ធ្វើ​វិសោធនកម្ម​ច្បាប់​ឱ្យ​ស្រប​តាម​ស្តង់ដា​អន្តរជាតិ​ចំពោះ​សិទ្ធិ​សេរីភាព​ បញ្ចេញ​មតិ​ សិទ្ធិ​ទទួល​បាន​ព័ត៌មាន​ និង​ ដោះស្រាយ​បញ្ហា​ប្រឈម​សម្រាប់​អ្នកសារព័ត៌មាន​ស្តី្រ​ជាដើម។ លោក​ ណុប វី នាយក​ប្រតិបត្តិ​នៃ​សមាគម​សម្ព័ន្ធ​អ្នក​សារព័ត៌មាន​កម្ពុជា​បាន​ថ្លែង​បែប​នេះ​ក្នុងបទ​សម្ភាសន៍​ ជាមួយ​លោក សុខ ខេមរា នៃវីអូអេ​ ពី​រដ្ឋធានី​វ៉ាស៊ីនតោន ​នៅ​ក្នុង​កម្មវិធី«វិជ្ជាជីវៈ​សារព័ត៌មាន​សំខាន់»ដែល​ជា​កម្មវិធី​ថ្មី​មួយ​របស់​វីអូអេកាល​ពី​ថ្ងៃ​អង្គារទី២៣ ​ខែ​សីហា ឆ្នាំ​២០២២។ សូម​លោក​អ្នក​ស្តាប់​បទ​សម្ភាសន៍​នេះ​ដូច​តទៅ៖

លោក សួន ប៊ុនរិទ្ធ គឺ​ជា​នាយក​ប្រតិបត្តិ​អង្គការ​សង្ឃឹម​កុមារ​កម្ពុជា។ អង្គការ​សង្ឃឹម​កុមារ​កម្ពុជា​នេះ​គឺ​ជា​អង្គការ​មួយ​ដែល​មាន​ទីស្នាក់ការ​នៅ​ក្នុង​ភូមិ​រង្វាន ស្រុក​ភ្នំស្រុក ខេត្ត​បន្ទាយមានជ័យ ដែល​មាន​បេសកកម្មជួយ​ដល់​ការ​អប់រំ​របស់​កុមារ​នៅ​ក្នុង​ភូមិ​នៅ​ជនបទ​ដាច់ស្រយាល​មួយ​នេះ។​ អង្គការ​នេះព្យាយាម​នាំ​ការ​អប់រំមក​ដល់​មូលដ្ឋាន​ផ្ទាល់​ ដោយ​យល់​ថា​តំបន់​ជនបទ​មាន​ធនធាន​អប់រំ​តិច​ជាង​តំបន់​ទីក្រុង​និង​ទី​ប្រជុំជន ហើយ​ការ​អប់រំ​ជា​គន្លឹះ​ជួយ​កាន់​បន្ថយ​ភាព​ក្រីក្រ។ លោក សួន ប៊ុនរិទ្ធ បាន​ផ្ដល់​បទសម្ភាសន៍​ដល់​អ្នកស្រី ហុង ចិន្ដា នៃ VOA តាម​ទូរសព្ទ​កាល​ពី​ថ្ងៃទី ១៦ ខែ​សីហា កន្លង​ទៅ​នេះ អំពី​បេសកកម្ម​របស់​អង្គការ​របស់​លោក ក្នុង​អំឡុង​ពេល​ដែល​លោក​កំពុង​ធ្វើ​ទស្សនកិច្ច​នៅ​ក្នុង​សហរដ្ឋ​អាមេរិក​។ សូម​លោក​អ្នក​នាង​ស្ដាប់​បទសម្ភាសន៍​នេះ​ដូច​ត​ទៅ៖

រយៈពេល​ជិត​ ៥ ឆ្នាំ​ហើយ​ដែល​លោក ជា ជីវ ​អតីត​ប្រធាន​ប្រតិបត្តិ​ប្រចាំ​ខេត្ត​បាត់ដំបង​របស់​គណបក្ស​សង្រ្គោះ​ជាតិ​ ត្រូវ​បាន​កាត់​ផ្តាច់​សិទ្ធិ​នយោបាយ​ ក្រោយ​តុលាការ​កំពូល​បានរំលាយ​គណបក្ស​នេះ។ ទោះជា​យ៉ាងណា លោក​បាន​បន្ត​ស្នាក់​នៅ​ក្នុង​ប្រទេស​ ទោះ​រង​ការ​ធ្វើ​ទុក្ខ​បុក​ម្នេញផ្នែក​នយោបាយ​ក៏​ដោយ។ ប៉ុន្តែ​ពេល​នេះ លោក​បាន​សម្រេចចាក​ចេញ​ទៅ​ក្រៅ​ប្រទេស ហើយ​បាន​សុំសិទ្ធិ​ជ្រក​កោន​នយោបាយ ដោយសារ​ក្តី​បារម្ភ​អំពី​សុវត្ថិភាព​និង​ការ​ចាប់​ខ្លួន។ នៅ​ក្នុង​បទ​សម្ភាសន៍​មួយ​ជាមួយ​វីអូអេ​កាល​ពី​ថ្ងៃ​ទី​១៩ ខែ​សីហា ឆ្នាំ​២០២២ លោក​ថ្លែង​ថា​ លោក​មិន​ចង់​ចាក​ចេញ​ពី​ស្រុក​កំណើត​ឡើយ។ លោក​បញ្ជាក់​ថា៖ «វត្ថុ​និង​គោល​បំណង​របស់​ខ្ញុំ​មិន​ចង់​ឆ្ងាយ​ពី​ទឹក​ដី​កំណើត​របស់​ខ្ញុំ​ទេ។ ខ្ញុំ​ចង់​ចូល​រួម​ក្នុង​ជីវភាព​នយោបាយ។ ខ្ញុំ​មាន​បំណង​ជួយ​ប្រជាពលរដ្ឋ​នៅ​ទឹក​ដី​ខេត្ត​បាត់ដំបង​របស់​ខ្ញុំ ដែល​ខ្ញុំ​បាន​បំពេញ​កិច្ច​ការងារ​ជាង​រយៈពេល​ ២០ ​ឆ្នាំ​កន្លង​មក​នេះ»៕

កាលពី​ថ្ងៃ​អង្គារ ទី​ ១៦ ខែ​សីហា ឆ្នាំ​ ២០២២ អាជ្ញាធរ​ក្នុង​ខេត្ត​តាកែវ បាន​ឃាត់​ខ្លួន​អ្នក​សារព័ត៌មាន​សំឡេង​ប្រជាធិបតេយ្យ (VOD) ​ចំនួន​ ៥ ​នាក់ និង​យុវជន​ខ្មែរ​ថាវរៈ​ចំនួន ៤ នាក់ ​ដោយ​ឃុំ​ពួកគេ​អស់​ជាច្រើន​ម៉ោង​ មុន​នឹង​ដោះ​លែង។ ​ការ​ឃាត់​ខ្លួន​នេះ​ធ្វើឡើង​ បន្ទាប់ពី​ពួកគេ​ទៅ​ធ្វើ​សេចក្តី​រាយការណ៍​ជុំ​វិញប​ញ្ហា​ឈូស​ឆាយ​ដីព្រៃ និង​ដាំ​ឡើង​វិញ នៅ​ដែន​ជម្រក​សត្វ​ព្រៃ​ភ្នំ​តាម៉ៅ ស្ថិត​ក្នុង​ស្រុកបាទី ខេត្ត​តាកែវ។​ អ្នក​ស្រី​ កាន់ វិច្ឆិកា​ នៃវីអូអេ បាន​សម្ភាសន៍​ កញ្ញា សុគុណ តុលា សមាជិក​យុវជន​ខ្មែរ​ថាវរៈ​ អំពី​មូលហេតុ​នៃការ​ឃាត់​ខ្លួន​នេះ៕

តំណាង​សភា​ពាណិជ្ជកម្ម​អាមេរិក​ប្រចាំកម្ពុជា​ (AmCham Cambodia) កាល​ពី​ពេល​ថ្មីៗ​នេះ បាន​បំពេញ​ទស្សនកិច្ច​នៅ​រដ្ឋធានី​វ៉ាស៊ីនតោន ជា​ផ្នែក​មួយ​នៃ​ក្រុម​ប្រតិភូ​សភា​ពាណិជ្ជកម្មអាមេរិក​ប្រចាំ​តំបន់​អាស៊ី​ប៉ាស៊ីហ្វិក ដើម្បី​ជួប​ជាមួយ​អ្នក​មុខ​អ្នក​ការ​អាមេរិកាំង និង​ឈ្វេង​យល់​បន្ថែម​ពី​គោល​នយោបាយ​របស់​រដ្ឋាភិបាល​អាមេរិក​ទាក់​ទង​នឹង​ក្របខ័ណ្ឌ​សេដ្ឋកិច្ច​ឥណ្ឌូ​ប៉ាស៊ីហ្វិក​និង​តំបន់​អាស៊ីអាគ្នេយ៍។ លោក សាយ មុន្នី នៃ​វីអូអេ បាន​សម្ភាសន៍​លោក Anthony Galliano ប្រធាន​សភា​ពាណិជ្ជកម្ម​អាមេរិក​ប្រចាំកម្ពុជា អំពី​ដំណើរ​ទស្សនកិច្ច​នៅ​ខែ​កក្កដា និង​ទំនាក់ទំនង​ពាណិជ្ជកម្ម​រវាង​សហរដ្ឋ​អាមេរិក​និង​កម្ពុជា​ ដូច​តទៅ៖

បើទោះបី​ជា​បណ្តា​ប្រទេស​ជាច្រើន​បាន​បន្ត​សកម្មភាព​សេដ្ឋកិច្ច​ជាថ្មី​ឡើង​វិញ​ក្តី ជំងឺ​កូវីដ១៩​នៅ​តែ​បន្ត​បំប្លែង​ខ្លួន​ដែល​មកទល់​ពេលនេះ​វីរុស​ដែល​គេ​ឃើញ​កំពុង​ឆ្លង​លឿន​នោះ​គឺ​វីរុស​អូមីក្រុង​បំប្លែង​ថ្មី BA4 និង​ BA5។ កាលពី​ពេល​ថ្មីៗនេះ អ្នកនាង ស្រេង លក្ខិណា បាន​សម្ភាស​លោកវេជ្ជបណ្ឌិត តាំង តេកហុង ដែល​ចូលនិវត្តន៍នៅរដ្ឋ Florida សហរដ្ឋអាមេរិកអំពី​ជំងឺ​អូមីក្រុង​បំប្លែង​ថ្មី BA4 និង​ BA5 វិធី​ព្យាបាល​និង​វិធីការពារ​ខ្លួន​ពី​វីរុសនេះ។ តទៅទៀតនេះ​សូមលោក​អ្នកនាង​ស្តាប់​បទសម្ភាសន៍​នេះ​ដូចតទៅ៖

ក្នុង​រយៈពេលប៉ុន្មាន​ឆ្នាំ​ចុង​ក្រោយ​នេះ ខេត្តព្រះសីហនុមាន​ជន​បរទេស​ជាច្រើន ជាពិសេសជនជាតិ​ចិន បាន​មកធ្វើវិនិយោគ និង​ធ្វើ​ទេសចរ​នៅ​តំបន់​ឆ្នេរ​សមុទ្រ​ដ៏​ស្រស់​បំព្រង​មួយ​នេះ​របស់​កម្ពុជា។ ការណ៍​នេះ​បាន​ធ្វើ​ឱ្យ​តម្លៃ​អចលនទ្រព្យ​ក្នុង​ខេត្ត​ជាប់​មាត់​សមុទ្រ​មួយនេះ​ ឡើង​ថ្លៃ​ខ្លាំង ហួស​ពីការរំពឹង​ទុក។​ ប៉ុន្តែ​ក្នុង​រយៈពេល​ជាង​ពីរឆ្នាំ​មកនេះ ខេត្ត​ព្រះ​សីហនុ​បាន​រងផល​ប៉ះពាល់​ខ្លាំង​ពី​ការ​បិទ​អនឡាញ​ហ្គេម​តាម​ចំណាត់ការ​របស់​រដ្ឋាភិបាល និង​វិបត្តិ​ជំងឺ​កូវីដ​១៩ ដែល​បង្ក​ផល​ប៉ះពាល់​ដល់​វិស័យ​ទេសចរណ៍ សណ្ឌាគារ និង​កាស៊ីណូ។ ​ហើយ​ផល​ប៉ះពាល់​ដ៏​គួរ​ឲ្យ​កត់​សម្គាល់​ផង​ដែរ​នោះ គឺ​ការ​ជាប់​គាំង​នៃ​ផ្នែក​អចលន​ទ្រព្យ។ នៅ​ឆ្នាំ ២០២២ ​នេះ គេ​ឃើញ​វិស័យ​ឯកជន និង​ភាគីពាក់​ព័ន្ធ​ រួម​ទាំង​រដ្ឋបាល​ដឹកនាំ​ខេត្ត បានជួប​ប្រជុំ​គ្នា ដើម្បី​ដោះ​ស្រាយ​បញ្ហា​ជាប់​គាំង​មួយ​នេះ។ ​អ្នក​នាង កាន់ វិច្ឆិកា​ នៃវីអូអេ បាន​សម្ភាសន៍​លោក ឡុង ឌីម៉ង់ អភិបាល​រង​ខេត្ត​ព្រះ​សីហនុ អំពី​ការ​វិវត្តរបស់​ខេត្ត​ព្រះ​សីហនុ និង​ដំណើរ​នៃ​ការ​ការ​ដោះ​ស្រាយ​ភាព​ជាប់គាំង​វិស័យ​អចលនទ្រព្យ​នេះ៕

​វិបត្តិ​លំហូរ​ចំណាក​ស្រុក​ទ្រង់​ទ្រាយ​ធំ និង​វិបត្តិ​អសន្ដិសុខ​ស្បៀង​ ​អាច​កើត​ឡើង​នា​ពេល​ខាង​មុខ នៅ​តំបន់​អាស៊ី​អគ្នេយ៍​ដីគោក បើ​សិន​ជា​ស្ថានភាព​ទន្លេ​មេគង្គ​បន្ត​សិ្ថត​ក្នុង​សភាព​យ៉ាប់​យ៉ឺន​ ដែល​បង្ក​ឡើង​ដោយ​ការ​ប្រែ​ប្រួល​អាកាស​ធាតុ​ និង​ការ​សាង​សង់​ទំនប់​វារីអគ្គិសនី​នៅ​ទាំង​នៅ​តំបន់​ខ្សែ​ទឹក​ខាង​លើ​ និង​ខ្សែ​ទឹក​ខាងក្រោម។ នេះ​ជា​ការ​ព្រមាន​របស់​អ្នក​ជំនាញ​គឺ​ លោក Brian Eyler នាយក​កម្មវិធី​អាស៊ីអាគ្នេយ៍ និង​កម្មវិធី​ថាមពល ធនធាន​ទឹក និង​ចីរភាព​ នៅ​មជ្ឈមណ្ឌល Stimson។ លោក Eyler បាន​ថ្លែង​ដូច្នេះ​ នៅ​ក្នុង​កិច្ច​សម្ភាស​ជាមួយ​លោក អូន ឆេងប៉រ នៃ​វីអូអេ៕