客語歌曲

節目來賓： 客家金曲歌王─謝宇威 在這塊不大的台灣島上，孕育著豐富的族群文化； 歷史告訴我們，不同的族群間有不同的認同與衝突… 隨著時間的洪流，或許大家厭惡爭鬥，開始求同存異？ 不同的族群也漸漸找到共存的解方！ 在這二十年間，隨著客委會的成立及努力之下，客家文化益發壯大、並且為社會大眾所愛。 說到客家音樂，你會想到什麼呢？在山間高吟的山歌嗎？ 音樂到底在客家文化中扮演怎樣的角色？ 客家文化在今時今日看似已經蓬勃發展，但是，長遠來看，它是否依舊面臨失傳的危機呢？ 這集節目，讓我們一邊聽好歌，一邊跟謝宇威老師暢聊客家文化的音樂元素，以及他對文化傳承的想法吧！ 音樂作品：選自謝宇威個人創作專輯《天空又落水》 1. 叫我唱歌就唱歌 (客家平板) 2. 挑擔藍調 (客家傳統小調) 3. 搖滾山歌仔 (客家山歌仔) 4. 天空又落水 (新創歌曲)

不管出了幾張專輯，一去到主持人全都是問這個問題，今天一次在Podcast中解答出來！ 各位聽眾朋友大家好，亻厓係客家創作歌手曾仲瑋，係新竹縣个竹東人，亻厓創作海陸腔个客家歌曲。開始客家音樂創作差毋多有12年，目前發行三張客語創作專輯。第一張《掌牛哥》、第二張專輯《仙哥》，舊年底發行咧第三張專輯《O nga O nga》，寫自家這下已經變做爺哀咧，愛㧡起自家个屋下，裡背个心路歷程。這張專輯乜入圍了第三十二屆金曲獎 - 最佳客語歌手獎喔。 一開始會創作客家歌曲，正經愛承蒙亻厓个小學同學 - 張慧君，一直有保持聯絡个亻恩俚，在佢讀中央大學客家文化研究所个時節，拍了一部摘茶阿婆个紀錄片，講一個摘茶阿婆子女當成功了，佢還係逐日恁煞猛做事無休息。 因為慧君知亻厓有在外背唱歌表演，尋亻厓創作一條客家歌曲，分佢个紀錄片做主題曲。該時節亻厓正經當愁慮！因為亻厓毋會講客，仰般做客家歌呢？好在摎亻厓姆討論紀錄片以後，佢試著頭擺个婦人家斯係恁樣形生活啊～細時節斯開始在外背做工換飯吃。嫁人以後為著子女奉獻一生，乜當會理家。子女大了飛出去以後，又係恁樣勞碌做事無停下來，乜係這部紀錄片想愛傳達”認真个阿婆最靚”个想法。 所以阿姆摎亻厓寫當多歌詞下來，斯開始亻厓个第一條客家創作“最靚个阿婆”，收錄在亻厓第一張專輯掌牛哥裡背。當承蒙客家委員會舉辦當多創作比賽，慢慢仔亻厓對寫客家歌乜寫出興趣，開始多了解客家文化、客家詞彙，客語認證。這下乜係新竹市摎新竹縣个國小客語先生喔～開始做還較多个傳承，希望這下个小朋友莫像自家共樣，細時節毋會講客，大了正來學，莫分客家話毋見忒！ 今晡日想愛介紹這條歌曲，安著”戀戀路邊花”。毋知路邊花个人可能會試著，路邊个花到底係麽个花呢？其實斯係”魯冰花”。講著”魯冰花”，大家定著會想著台灣文學之母”鍾肇政”先生，當有名个文學作品。有改編過電影，摎電影主題曲：”夜夜想起媽媽的話，閃閃的淚光魯冰花。”，因為鍾先生是龍潭人，龍潭當多茶園，茶園旁脣總會種路邊花來做綠肥，花開做得觀賞，花謝以後做肥草來委肥。所以滿哪係个路邊花這種無私、奉獻个精神，轉化為客家人心肝肚个母親花、阿姆花。 亻厓在一擺有機會參加路邊花節个活動，看著歸山黃淰淰个路邊花，隨風搖擺个樣仔當得人惜。又了解推廣路邊花無私个精神以後，試著當感動。在駛車轉屋當下，一有靈感斯停到路脣，摎副歌寫出來： ”戀戀路邊花，客家阿姆花。佢敢係在路脣，指點亻厓轉屋家。” ”戀戀路邊花，客家阿姆花。用佢个葉摎花，回養滿天下。” 主歌摎副歌中間加入客家山歌”平板”，希望恁樣个結合做得分後生人聽著，客家傳統歌曲乜當好聽！來聽看這條歌曲，戀戀路邊花。

各位聽眾朋友大家好，亻厓係客家創作歌手曾仲瑋，從細在新竹个竹東大欸，亻厓係創作海陸腔个客家音樂，開始客語歌曲創作个時間差毋多有12年，目前發行三張客語創作專輯，有入圍過兩擺金曲獎最佳客語歌手獎，今晡日想摎大家打嘴鼓，講亻厓自家創作个靈感到底對哪位來呢？ 其實一開始創作客家歌曲个時節亻厓毋會講客，聽乜聽有一點仔定定，所以正經當承蒙厓姆摎亻厓扌帣手當多，寫當多頭擺客家莊个故事，分亻厓這輩个人做得認識頭擺个生活，頭擺个情形係仰般形，亻厓斯根據摎亻厓聽著个故事去尋畫面感寫出歌曲，所以大體係先有詞正有曲。毋過後來自家開始摎母語拈轉來以後，慢慢仔自家做得用生活當中堵著个事情，用歌曲、歌詞記錄下來，算係這下當代个客家人生活个歌曲，斯無限制在客家傳統風俗咧。一開始寫追求細妹仔个歌”今晡日”、”草莓”，後來乜有寫毋想上班个心情，斯係”壞咧”這條歌曲，這擺第三張專輯《Onga Onga》主要斯講自家做爺哀咧，有麽个想法無共樣，有麽个成長个位所。 今晡日想愛摎大家介紹个這條歌曲”幸福兩公婆”，係講疫情恁嚴重个時節，雖然兩公婆在屋下逐日愁慮下一餐，煩惱倈仔當得人惜又當得人惱，毋過乜總係床頭打床尾和，不管外背發生麽个事情，只要兩儕人相知相惜，總做得共下撐起自家个家庭。所以這擺乜尋咧亻厓靚靚个餔娘曾怡玲摎亻厓扌帣手唱這條歌曲，大家共下來聽看喔～幸福兩公婆。

各位聽眾朋友大家好，亻厓係客家創作歌手曾仲瑋，來自新竹縣竹東鎮，亻厓係創作海陸腔个客家音樂，開始客語歌曲創作差毋多有12年咧，目前發行三張客語創作專輯，入圍兩擺金曲獎最佳客語歌手獎，這擺想愛摎大家介紹亻厓第三張專輯《Onga onga》裡背个一條歌曲「屙氵巴」。可能有人聽著歌名斯會笑出來，仰會有人用屙氵巴來做歌名？本來屙氵巴个意思斯係講人無責任感，大家會試著佢講个話聽毋得，毋會相信佢。在這位寫个其實係講頭擺个亻厓自家，因為亻厓頭擺在台北做頭路，該時節亻厓係一個電腦工程師，逐日試著自家囥在辦公室裡背，無法度追求自家好唱歌个夢想，一日又過一日，一年又過一年，毋知自家哪時節做得成功，有兜成就轉家鄉，所以寫咧這條歌曲，鼓勵大自家做得勇敢，往自家个夢想，自家想愛做个事情，大步向前行，莫緊企在原來个位所，越想越毋會做，斯像該時節个亻厓共樣。這條歌曲特別感謝編曲先生姜道，乜係專輯个製作人，佢聽忒這條歌曲个demo以後，摎這條歌曲打造無共樣个韓國舞曲風格，還分佢有記憶點，大家聽著歌曲斯會知有一段旋律緊出現，配合歌名屙氵巴，分客家屙氵巴搖身一變，變成韓國歐巴！ 這條歌曲在網路上乜有亻厓在鬧熱打擂台節目頂背一邊唱歌一邊跳舞个影片喔，承蒙編舞先生胡予欣摎亻厓扌帣手，第一擺做唱跳歌手，正經試著當緊張呢！希望自家个音樂風格做得越來越多元，越來越多風格，大家有閒做得尋來看喔！這下大家來聽這首歌曲～安著「屙氵巴」。

各位聽眾朋友大家好，亻厓係客家創作歌手曾仲瑋，來自新竹縣竹東鎮，聽亻厓講話斯知亻厓係創作海陸腔客家音樂个創作人，目前發行三張專輯。第一張係《掌牛哥》，講一個在客家庄摎人扌帣掌牛个細倈仔；第二張係《仙哥》，斯係掌牛哥大咧變成逐日樂線、無愁慮个仙哥；第三張專輯係《O nga O nga》，講自家有倈仔，做毋得樂線咧，肩頭愛㧡起責任咧。這擺第三張專輯入圍咧第32屆金曲獎，正經非常承蒙金曲獎評審先生个肯定，因為舊年有當多當多好聽个專輯，有亻厓欣賞个前輩，還有在餐廳唱歌時節个朋友，有出來比賽母語創作熟識个朋友，還有堵開始創作客家歌曲、大家試著當有發展性个新人。所以這擺做得入圍，一方面感謝專輯製作團隊个幫忙，製作人游鎮宇，姜道、配唱製作人樓羽軒，經紀人李東祐特別感謝。另外一方面乜係肯定咧亻厓自家這幾年个煞猛打拼，認真學習客話。熟識仲瑋个人定著會知，頭兩張專輯大體係亻厓媽媽-劉玉梅女士摎亻厓扌帣手寫歌詞，毋過這張專輯全部係自家作詞作曲，乜總算對得起自家這下國小客語先生个角色，乜係自家創作客家歌曲十年咧，總算有一息息成績出來。 第一條想愛介紹分大家个係主打歌曲O nga O nga，該時節因為亻厓倈仔堵降出來，細細个嬰兒佢逐日onga onga个聲噭分亻厓聽，亻厓雖然試著毋盼得，毋過係希望佢遽遽睡目正會遽遽大，乜毋使緊聽噭聲，聽著發火！所以寫咧一條搖籃曲分佢。第一段爸爸唱，爸爸唱忒換媽媽唱，斯尋亻厓餔娘曾怡玲摎亻厓扌帣手，佢乜係一個當會唱歌个細阿妹仔，從細斯開始唱客家山歌，乜算係亻厓客家个前輩喔！大家共下來聽看這條歌曲～O nga O nga～