"Dagáll læknanemans" er nýtt hlaðvarp fyrir læknanema (cc: Félag læknanema) og aðra áhugasama um hvaðeina sem viðkemur klínik og læknisfræði. Hlaðvarpið fær til sín sérfróða gesti og tekur fyrir ýmis læknisfræðileg vandamál. Í þessum þætti ræðir Sunna Snædal, sérfræðingur í nýrnalækningum og almennum lyflækningum, um bráðan nýrnaskaða. Hvað er bráður nýrnaskaði, hvaða lyf þarf að stöðva og hverjar eru ábendingar fyrir skilun? Hvernig verður maður vinur afsteypanna? Sunna afhjúpar einnig uppáhalds nýrnavandamálið sitt.
Stjórnendur Dagáls læknanemans eru Sólveig Bjarnadóttir læknanemi á 6. ári og Teitur Ari Theodórsson læknanemi á 5. ári. Dagáll læknanemans er sjálfstæð þáttasyrpa innan Hlaðvarps Landspítala.
Hlaðvarp Landspítala er aðgengilegt á vefsvæðum spítalans og helstu samfélagsmiðlum, en einnig í streymisveitunum Spotify og Apple iTunes, ásamt hlaðvarpsveitum á borð við Simplecast, Pocket Casts og Podcast Addict.
Sunna byrjar á að skilgreina bráðan nýrnaskaða og segir svo frá hvernig hún metur sjúkling með versnandi nýrnastarfsemi; hvaða spurninga skal spyrja og hvernig er sé best að meta vökvaástand sjúklings. Mikilvægi kerfisbundinnar nálgunar við mat á mögulegri orsök bráðs nýrnaskaða er rætt. Þá er talað um gildi þvagskoðunar og hvernig maður getur gerst vinur afsteypanna. Förum sömuleiðis yfir hvaða lyf geta ýtt undir bráðan nýrnaskaða, hverjar afleiðingar af bráðum nýrnaskaða geta orðið og hvernig sé hægt að bregðast við þeim með lyfjameðferð. Að lokum fer Sunna yfir hvað skal gera ef allt um þrýtur, ábendingar nýrnaskilunar og langtímahorfur sjúklinga með bráðan nýrnaskaða.
SIMPLECAST
https://landspitalihladvarp.simplecast.fm/dagall-02
(Tónlist: "Garden Party" með Mezzoforte. Notað með leyfi frá hljómsveitinni.)